वाळूज महानगर : वडगाव कोल्हाटी परिसरात बेशुद्धावस्थेत आढळून आलेल्या एका ३५ वर्षीय अनोळखी इसमाचा शासकीय रुग्णालयात मृत्यू झाला आहे. मंगळवार (दि.१६) सायंकाळी ५.४५ वाजेच्या सुमारास एक अनोळखी इसम बेशुद्धावस्थेत वडगाव परिसरात आढळून आला होता. १०८ रुग्णवाहिकेतून पुढील उपचारासाठी शासकीय रुग्णालयात दाखल केले असता डॉक्टरांनी तपासून त्यास मयत घोषित केले. या अनोळखी इसमाला कोणी ओळखत असल्यास एमआयडीसी वाळूज पोलीस ठाण्यात संपर्क साधण्याचे आवाहन पोना. आदमाने यांनी केले आहे.
---------------------
बजाजनगरातून तरुणी बेपत्ता
वाळूज महानगर : बजाजनगरातून एक २० वर्षीय तरुणी बेपत्ता झाल्याची तक्रार एमआयडीसी वाळूज पोलीस ठाण्यात दाखल करण्यात आली आहे. ऋतुजा दशरथ मात्रे (२०, रा. बजाजनगर) या तरुणीचा १९ मार्चला रात्री आईसोबत किरकोळ वाद झाला होता. या वादानंतर ऋतुजा ही घरातून निघून गेली आहे. याप्रकरणी दशरथ मात्रे यांनी एमआयडीसी वाळूज पोलीस ठाण्यात मुलगी बेपत्ता झाल्याची तक्रार दिली आहे.
--------------------
छोटा हत्ती रस्त्यावरील खांबाला धडकला
वाळूज महानगर : भरधाव छोटा हत्ती रस्त्यावरील खांबाला धडकल्यानंतर तो हातगाडीवर जाऊन आदळल्याची घटना आज बुधवारी (दि.१७) सिडको वाळूज महानगरात घडली.
सिडको वाळूज महानगरातून छोटा हत्ती (एमएच-२० सीटी-७६७६) हा भरधाव जात असताना सकाळी जिजामाता चौकातील एका महापुरुषाचे नाव असलेल्या खांबावर व नंतर लगतच्या हातगाडीवर जाऊन धडकला. सुदैवाने हातगाडीवर भाजीपाला विक्री करणारी महिला व तिचा मुलगा पाणी पिण्यासाठी लगतच्या हॉटेलमध्ये गेल्याने बचावले.
--------------------------