औरंगाबाद : चिकलठाणा आंतरराष्ट्रीय विमानतळावरील धावपट्टीचा विस्तार केला जात असून, १८२ एकर जमिनीचे संपादन करण्यासाठी १८ ते ३० जानेवारीपर्यंत संयुक्त मोजणी झाली. त्यानंतर सहा महिन्यांनी शहर भूमिअभिलेख कार्यालय हद्दीत येणाऱ्या सुमारे २५० मालमत्तांची मोजणी मंगळवारपासून सुरू झाल्याचे अधिकाऱ्यांनी सांगितले.
महाराष्ट्र विमानतळ विकास कंपनी लि.ने भू-मोजणीच्या अनुषंगाने ३ लाख ५१ हजार रुपये ऑक्टोबर २०२० मध्ये भूमिअभिलेख कार्यालयास जमा केले होते, परंतु शहर भूमापन कार्यालयाचे शुल्क भरले नव्हते. नगर भूमापन कार्यालयाचे शुल्क कंपनीने भरल्यानंतर प्रत्यक्षात मोजणी सुरू करण्यात आली आहे. असे नगरभूमापन अधिकारी गणेश सोनार यांनी सांगितले. चिकलठाणा येथील गट नं. ४१०, ४१४, ४१५, ४१६, ४१७ आणि ५५५ मध्ये मोजणी झाली आहे. मोजणीअंती सीमांकन करण्यात आले आहे.
सध्या विमानतळाची धावपट्टी ९ हजार ३०० फूट म्हणजेच २ हजार ८३५ मीटर आहे. १२ हजार फुटांपर्यंत धावपट्टी विस्तारीकरणाचा प्रस्ताव असून, २७०० फुटांसाठी भूसंपादन करावे लागत आहे. ८२५ मीटर लांबीची धावपट्टी नव्याने करण्यासाठी भूसंपादनाचा प्रस्ताव पुढे आला आहे. पहिल्या टप्प्यात १५५ एकर, दुसऱ्या टप्प्यात साडेतीन एकर, तिसऱ्या टप्प्यात दोन एकर आणि चौथ्या टप्प्यात २० एकर अशी १८२ एकर संपादित करण्यात येणार आहे.
विमानतळ भूसंपादन असे
गावठाणसह अंदाजे किती मालमत्ता जाणार - १२०० ते १३००
किती जमीन ताब्यात घेणार - १८२ एकर
धावपट्टीचे विस्तारीकरण किती - ८२५ मीटर
कोणत्या गटात होत आहे मोजणी - मुकुंदवाडीतील १३, १५, १६, १८, २६, २७
मूर्तजापूरमधील ३४, ३०, ३१,- चिकलठाणा येथील गट नं. ४१०, ४१४, ४१५, ४१६, ४१७, ५५५
सध्या विमानतळाची धावपट्टी किती - ९ हजार ३०० फूट म्हणजेच २ हजार ८३५ मीटर
किती फूट धावपट्टीचा विस्तार - १२ हजार फुटापर्यंत धावपट्टी विस्तार
पहिल्या टप्प्यात किती भूसंपादन - १५५ एकर
दुसऱ्या टप्प्यात किती भूसंपादन - साडेतीन एकर
तिसऱ्या, चौथ्या टप्प्यात किती भूसंपादन - दोन एकर आणि २० एकर
भूमापन अधिकाऱ्यांची माहिती अशी
नगरभूमापन अधिकारी गणेश सोनार यांनी सांगितले, गावठाण हद्दीतील मालमत्तांची मोजणी सुरू केली आहे. पूर्ण मोजणीसाठी एक आठवडा लागेल. त्यानंतर अंतिम आखणी होईल. सर्व मालमत्ताधारकांना नोटिसा दिल्या आहेत. काही मालमत्ता नगर भूमापन हद्दीत आहेत, परंतु त्या अनधिकृत आहेत. त्या मालमत्तांचीदेखील मोजणी करण्यात येणार आहे. २०० ते २५० मालमत्ता भूमापन कार्यालय हद्दीत असल्याचे सोनार म्हणाले. सीटीएस क्रमांक ४०४ पासून मालमत्ता बाधित होणार आहेत.