वाळूज महानगर : वाळूज महानगर परिसरातील २१ ग्रामपंचायतींसाठी शुक्रवार (दि.१५) शांततेत मतदान झाले. या परिसरात बहुतांश ठिकाणी मतदार याद्यांत झालेल्या घोळामुळे मतदानाचा हक्क बजावण्यासाठी आलेल्या मतदारांना मनस्ताप सहन करावा लागला, तर पंढरपुरातील मयत व्यक्तीच्या नावावर मतदान करण्याचा प्रयत्न केंद्राध्यक्षांनी हाणून पाडला.
औद्योगिक क्षेत्रातील श्रीमंत म्हणून ओळखल्या जाणाऱ्या रांजणगाव, जोगेश्वरी, वाळूज, पंढरपूर, अंबेलोहळ, नारायणपूर या ग्रामपंचायती ताब्यात घेण्यासाठी महाविकास आघाडी व भाजपने ताकद लावली आहे. या निवडणुकीत सरपंचपदाचे घोषित करण्यात आलेले आरक्षण शासनाच्या वतीने रद्द करण्यात आल्याने सरपंचपदाचे दावेदार असलेल्या मातब्बर उमेदवारांचा हिरमोड झाला आहे. निवडणूक निकालानंतर सरपंचपद वेगळ्याच प्रवर्गासाठी निघाल्यास सत्तेची उब मिळणार नसल्याने मातब्बर उमेदवारांनी पॅनलचा खर्च करण्यास नकार दिल्याने अनेकांना स्वखर्चाने रणांगणात उतरावे लागले. शुक्रवारी सकाळपासून मतदारांनी मतदानाचा हक्क बजावण्यासाठी ठिकठिकाणच्या केंद्रासमोर गर्दी केली होती. उमेदवाराकडून मतदारांना ने-आण करण्यासाठी वाहनांची व्यवस्था करण्यात आल्याने अनेकांनी सकाळीच मतदान केले. दुपारनंतर मतदान केंद्रावर फारशी गर्दी दिसून आली नाही. सायंकाळी ४ वाजेनंतर कंपनीतून सुटी झाल्यानंतर कामगार मतदारांनी मतदानाचा हक्क बजावण्यासाठी मतदान केंद्रावर गर्दी केली होती. कोरोनाच्या पार्श्वभूमीवर मतदान केंद्रावर मतदारांची ऑक्सिमीटर व थर्मल गनने तपासणी करण्यात आली. यानंतर सॅनिटायझर लावल्यानंतर मतदारांना केंद्रात प्रवेश देण्यात आला.
ज्येष्ठ व दिव्यांग मतदारांत उत्साह
ग्रामपंचायतीच्या या निवडणुकीत ज्येष्ठ नागरिक, तसेच दिव्यांग मतदारांनी कुटुंबातील सदस्यांच्या मदतीने मतदान करण्यासाठी केंद्रावर हजेरी लावली होती. मतदान केंद्रावरील पोलीस कर्मचाऱ्यांनीही दिव्यांग व वयोवृद्ध मतदारांना रांगेत उभे न करता त्यांना तात्काळ मतदानासाठी केंद्रात सोडले. पवित्र मतदानाचा हक्क बजावण्यासाठी ज्येष्ठ मतदारांत उत्साह होता.
याद्यांतील घोळामुळे मतदार नाराज
ग्रामपंचायतीच्या निवडणुकीत रांजणगाव, वाळूज, जोगेश्वरी, पंढरपूर आदी ठिकाणी एकाच कुटुंबातील मतदारांची नावे वेग-वेगळ्या प्रभागांत गेल्याने मतदारांनी नाराजी व्यक्त केली. अनेक मतदारांना पोलिंग चीट न मिळाल्याने त्यांना आपले मतदान कोणत्या केंद्रावर आहे हे पाहण्यासाठी चांगलीच कसरत करावी लागली. मतदार याद्यांत झालेल्या घोळामुळे अनेक मतदारांनी नाराजी व्यक्त करून याचे खापर प्रशासनावर फोडले.
पंढरपुरात मयत मतदाराच्या नावाने मतदानाचा प्रयत्न
पंढरपूर येथील जुन्या जि.प. शाळेत भास्कर जयाजी ढोले (६२) या मयत मतदाराच्या नावे मतदानाचा हक्क बजावण्यासाठी एक जण मतदान केंद्रावर आला होता. मात्र, केंद्राध्यक्ष अमोल वैराग यांना संशय आल्याने त्यांनी त्या मतदारास रोखून ठेवत केंद्रावर बसवून ठेवले. यानंतर दोन महिला बनावट मतदान ओळखपत्र घेऊन मतदान करण्यासाठी आल्या होत्या. या महिलांनाही मतदान केंद्रावर रोखल्याने त्यांना मतदानाचा हक्क बजावता आला नाही. या प्रकाराची माहिती मिळताच सहा. पोलीस आयुक्त सुरेश वानखेडे, सहा. पोलीस आयुक्त विवेक सराफ, पोनि. मधुकर सावंत यांनी या केंद्रावर भेट देऊन पाहणी केली. मात्र, मतदान केंद्राध्यक्ष वैराग यांनी तक्रार न दिल्यामुळे या बोगस मतदारांवर पोलीस प्रशासनाला कारवाई करता आली नाही.
मतदान केंद्रावर पोलिसांचा तगडा बंदोबस्त
वाळूज व एमआयडीसी हद्दीतील २१ ग्रामपंचायतींसाठी १३८ बुथवर मतदानाची व्यवस्था करण्यात आली होती. प्रत्येक मतदान केंद्रावर तगडा बंदोबस्त ठेवण्यात आल्यामुळे कुठलाही अनुचित प्रकार घडला नाही. जोगेश्वरी, रांजणगाव व पंढरपुरात मतदान केंद्रात मतदारांना रस्त्यात रोखणाऱ्या उमेदवार व पोलिंग एजंटला पोलिसांनी तंबी देत केंद्रात येण्यास मज्जाव केल्याने या केंद्रावर शाब्दिक चकमकी उडाल्या होत्या. पोलीस निरीक्षक मधुकर सावंत व वाळूजचे निरीक्षक संदीप गुरमे यांनी चोख बंदोबस्त ठेवल्यामुळे कुठलाही अनुचित प्रकार घडला नाही.
--------------------------------