ऑनलाइन लोकमत
औरंगाबाद, दि. 11 - शहरातील जिंसी पोलीस स्टेशनच्या हाकेच्या अंतरावर असलेल्या खास गेटजवळ पार्क केलेल्या दुचाकींना अज्ञातांनी आग लावल्याचे वृत्त समोर आले आहे. जिंसी पोलीस स्टेशनच्या समोरील रस्त्यावर ही घटना घडली आहे. मंगळवारी ( 11 जुलै ) पहाटे 4 वाजण्याच्या सुमारास ही घटना घडली आहे. या घटनेनंतर तीन अज्ञातांनी पळ काढल्याचे प्रत्यक्षदर्शींनी पाहिले.
जळण्याचा वास आल्याने तसेच स्फोट झाल्यासारखा आवाज आल्यानं घरमालकाच्या ही बाब लक्षात आली. यावेळी त्यानं तातडीनं आग विझवण्याचा प्रयत्न केला. रात्रीपाळीवर असलेल्या चार्ली पोलिसांनी ही घटना पाहिली व त्यांनी जिंसी पोलिसांना याबाबतची माहिती दिली. राशिद खान हाफिजउल्ला खान, सय्यद मेराज अली सय्यद मकसूद अली आणि मोहम्मद अय्यूब मोहम्मद सुभान यांच्या गाड्या जाळण्यात आल्या आहेत.
पोलीस घटनास्थळापर्यंत पोहोचेपर्यंत मालकांनी आपल्या जळत्या गाड्या विझवल्या होत्या. पोलीस घटनास्थळी दाखल झाल्यानंतर त्यांना घटनेचा पंचनामा केला व सध्या पुढील तपास सुरू आहे.