हतनूर : धुळे-सोलापूर महामार्गावर हतनूरजवळ अतिशय वेगात आलेली कार उसाच्या ट्रॅक्टरला पाठीमागून धडकल्याने भीषण अपघात झाला. कारमधील चालकासह अकरा प्रवासी गंभीर जखमी झाले असून, त्यांना औरंगाबाद येथील घाटी रुग्णालयात उपचारासाठी दाखल करण्यात आले.
सिल्लोड तालुक्यातील पेंडगाव येथील काही लोक करंजगाव येथील नातेवाइकांच्या अंत्यविधीसाठी कारने (क्र. एम. एच. २०. डी. व्ही. २८३०) गेले होते. तेथील अंत्यविधीचा कार्यक्रम आटोपल्यानंतर कारने कन्नडच्या दिशेने पुन्हा परत निघाले. तेव्हा कन्नडच्या दिशेलाच जाणाऱ्या उसाच्या ट्रॅक्टरला पाठीमागून कारने जोरदार धडक दिली. हा अपघात इतका भीषण होता की, त्यात कारच्या पुढील बाजूचा चुराडा झाला. कारमधील चालकासह अकरा प्रवासी गंभीर जखमी झाले आहेत. ही घटना घडताच, हतनूर गावातील अनवर पठाण या तरुणाने त्याच्या स्वत:च्या मिनी टेम्पोतून हतनूर प्राथमिक रुग्णालयात जखमींना उपचारासाठी दाखल केले. घटनास्थळी हतनूर गावातील तरुण मोठ्या संख्येने धावत आले. तरुणांनी काही जखमींना रुग्णवाहिकेतून औरंगाबाद येथील घाटी रुग्णालयात उपचारासाठी दाखल केले.
जखमीत यांचा आहे समावेश
बेगुशहा, बिस्मिल्ला शहा, युनूस शहा, अब्दुल शहा, बनू शहा, शिल्पाबी शहा, बानुबी शहा, कुबराबी शहा, अमिनाबी शहा (सर्व रा. पेंडगाव, ता. सिल्लोड) व चालक भीमराव बोऱ्हाडे (रा. चारणेर) यांचा जखमींत समावेश आहे. जखमीमध्ये तीन जणांची प्रकृती अतिगंभीर असल्याचे प्रथमदर्शनी लोकांनी सांगितले.