वाळूज महानगर : वाळूज उद्योगनगरीत खुनाचे सत्र सुरू असून बुधवारी सकाळी ६ वाजेच्या सुमारास बजाजनगरातील एस.टी. कॉलनीत एका अनोळखी महिलेचा अर्धनग्न व हात बांधलेल्या अवस्थेतील मृतदेह सापडल्याने परिसरात खळबळ उडाली आहे. या महिलेला मारहाण करून तिचा खून केल्याचा अंदाज पोलिसांनी वर्तविला आहे.
याविषयी अधिक माहिती अशी की, बजाजनगरातील एसटी कॉलनीत बुधवारी सकाळी ६ वाजेच्या सुमारास दत्तात्रेय पांढरे यांना अनिल वऱ्हाडे व अतुल राणे यांच्या घरासमोर एक अनोळखी महिला रक्ताचे थारोळ्यात असलेली दिसून आली. या प्रकाराची माहिती त्यांनी घरमालकाला दिली. या घटनेची माहिती मिळताच पोलीस निरीक्षक प्रशांत पोतदार, सहा. पोनि. मदनसिंग घुनावत यांनी पोलीस कर्मचाऱ्यांसह घटनास्थळ गाठले. यावेळी त्या अनोळखी महिलेच्या अंगावर असलेली साडी बाजूला काढली असता तिचे दोन्ही हात ओढणीने बांधलेले तसेच चेहऱ्यावर मारहाणीच्या खुणा दिसून आल्या. हा खुनाचा प्रकार असल्याचे लक्षात येताच पोलिसांनी महिलेचा मृतदेह शासकीय रुग्णालयात पाठवून दिला.
चेहराही रक्ताने माखलेला
या अनोळखी महिलेस मारेकऱ्यांनी सुरुवातीला मारहाण केली असावी, असा अंदाज पोलिसांनी वर्तविला आहे. तिच्या चेहऱ्यावर मारहाणीच्या खुणा असून चेहराही रक्ताने माखलेला आहे. तिचे दोन्ही हात ओढणीने बांधलेले होते. या महिलेचा खून केल्यानंतर तिच्या प्रेताची विल्हेवाट लावण्यासाठी मारेकरी जात असताना कुणीतरी येत असल्याची चाहूल लागल्याने मारेकरी तिचा मृतदेह एसटी कॉलनीत टाकून पसार झाल्याचा अंदाज पोलिसांनी वर्तविला आहे.
श्वान पथक घटनास्थळीच घुटमळले
या खुनाची माहिती मिळाल्यानंतर श्वान व फॉरेन्सिकच्या लॅबक्या पथकाने घटनास्थळ गाठून रक्ताचे नमुने तपासणीसाठी घेतले. यावेळी श्वान टिपू हा घटनास्थळीच घुटमळल्याने मारेकरी वाहनातून पसार झाल्याचा अंदाज वर्तविण्यात आला आहे. या प्रसंगी श्वान पथकाचे एम. एम. तनपुरे, ए. व्ही. मोरे, ए. के. महेर आदींची उपस्थिती होती.
महिलेचा खून झाल्याची माहिती मिळताच सहायक पोलीस आयुक्त विवेक सराफ, पोलीस निरीक्षक मधुकर सावंत आदींनी घटनास्थळी भेट देऊन पाहणी करून नागरिकांशी चर्चा करून माहिती जाणून घेतली. या भागातील कोण महिला बेपत्ता आहे का, याची विचारपूस केली. कॉलनीतील सर्व घरांमध्ये जाऊन महिलेची ओळख पटविण्याचा प्रयत्न केला. या भागातील सीसीटीव्ही कॅमेऱ्याच्या मदतीने मारेकऱ्याचा शोध घेण्याचे प्रयत्न सुरू असल्याचे पोलिसांनी सांगितले.
फोटो ओळ - बजाजनगरातील घटनास्थळाची पाहणी करताना पोलीस अधिकारी.