अपघातानंतर दुचाकीचा स्फोट

उस्मानाबाद : कारने दुचाकीला जोराची धडक दिल्याने दोघे गंभीर जखमी झाले़ अपघातानंतर दुचाकीचा अचानक स्फोट झाल्याने दुचाकी जळून खाक झाली़ ही घटना रविवारी सकाळी उस्मानाबाद तालुक्यातील पाडोळी (आ़) गावाजवळील उजनी मार्गावर घडली़ एका जखमीवर जिल्हा रूग्णालयात उपचार करण्यात येत असून, एकास सोलापूर येथील रूग्णालयात उपचारासाठी पाठविण्यात आले आहे़याबाबत रूग्णालयीन सूत्रांकडून मिळालेल्या माहितीनुसार, पाडोळी (आ़) येथील ज्योती पांडुरंग डोके (वय-६५) व पांडुरंग चेके (वय-३५) हे दोघे रविवारी सकाळी शेतातून दुचाकीवरून गावाकडे येत होते़ उजनी मार्गावरील एका मंदिराजवळ दुचाकी आली असता भरधाव वेगातील कारने जोराची धडक दिली़ या अपघातात दुचाकीवरील ज्योती डोके, पांडुरंग चेके हे दोघे गंभीर जखमी झाले़ तर अपघातानंतर काही काळातच दुचाकीचा मोठा स्फोट झाला़ या स्फोटामुळे लागलेल्या आगीत दुचाकी जळून खाक झाली़ जखमींना नागरिकांनी तत्काळ जिल्हा रूग्णालयात उपचारासाठी दाखल केले होते़ यातील गंभीर जखमी अवस्थेतील पांडुरंग चेके यांना पुढील उपचारासाठी सोलापूरकडे पाठविण्यात आले आहे़ घटनेची माहिती मिळाल्यानंतर पाडोळी दूरक्षेत्राचे पोहेकॉ चव्हाण यांनी घटनास्थळी धाव घेवून जखमींना मदत केली़ याप्रकरणी रात्री उशिरापर्यंत कोणत्याही प्रकारचा गुन्हा नोंदविण्यात आला नव्हता़ (प्रतिनिधी)