मोंढ्यातील बॅटको ट्रान्सपोर्टला भीषण आग

 औरंगाबाद : जुना मोंढा परिसरातील जाफरगेट शेजारच्या बॅटको ट्रान्सपोर्टच्या गोदामात मंगळवारी दुपारी साडेतीन वाजेच्या सुमारास अचानक आग लागून केमिकलच्या ड्रमचे स्फोट झाले. विशेष म्हणजे या गोदामाशेजारीच पेट्रोलपंप आहे. गोदामाला आग लागण्यापूर्वी अर्धा तास अगोदरच या पंपाच्या भूमिगत टाकीमध्ये १२ हजार लिटर पेट्रोलचे टँकर रिकामे करण्यात आले होते. सुदैवाने मोठा अनर्थ टळला. गोदामाच्या शेजारील दोन दुकानालाही आग लागली. या घटनेत २० लाख रुपयांचा माल जळून खाक झाला. जाफरगेटशेजारी असलेल्या बॅटको ट्रान्सपोर्टमध्ये मुंबई येथून केमिकलचे ड्रम पाठविण्यात आले होते. गोदामातील एका ड्रमला गळती होऊन केमिकल बाहेर आले होते. उन्हामुळे दुपारच्या वेळी ड्रमबाहेर वाहणार्‍या केमिकलला अचानक आग लागली व भडका उडाला. या भडक्याने अन्य ड्रमने पेट घेतला. आगीच्या भक्ष्यस्थानी पडलेल्या ड्रमचे स्फोट होऊ लागले. परिसरातील नागरिक व व्यापार्‍यांनी आग विझविण्याचे शर्तीचे प्रयत्न केले; पण आग धुमसत राहिली. हवेत धूर व आगीचे लोळ पसरले. या ट्रान्सपोर्टशेजारी असलेल्या जहीर यांचे वर्कशॉप व अजीज शेख यांच्या ड्रमच्या दुकानालाही आगीने वेढले. ट्रान्सपोर्टला लागलेली आग आटोक्यात येण्याचे नाव घेत नव्हती. त्यावेळी ट्रान्सपोर्टचे कर्मचारी तसेच नागरिकांनी जिवाची पर्वा न करता गोदामातील साहित्य हलविण्याचे प्रयत्न केले. परिसरातील व्यापार्‍यांनी अग्निशामक दलाला आगीच्या घटनेची माहिती दिली; पण तब्बल अर्ध्या तासानंतर अग्निशामक दलाचे जवान घटनास्थळी पोहोचले. अग्निशामक दलाचे प्रमुख शिवाजी झनझन यांच्या पथकातील २० कर्मचारी, ४ बंब व ६ टँकरने दीड तासात आग आटोक्यात आणली. या घटनेत २० लाख रुपयांचा माल जळून खाक झाला. बॅटको ट्रान्सपोर्टच्या गोदामाशेजारीच पेट्रोलपंप आहे. गेल्या वर्षी याच पंपाला मोठी आग लागली होती. आज दुपारी ३.१० मिनिटांनी १२ हजार लिटर पेट्रोल घेऊन एक टँकर आले. टँकरने पंपाच्या भूमिगत टाकीमध्ये पेट्रोल खाली केले व ते निघताच गोदामात आग भडकली. पेट्रोल रिकामे करतेवेळी जर आग लागली असती, तर मोठी दुर्घटना घडली असती. सुदैवाने आज मोठा अनर्थ टळला. अग्निशामक दलाच्या जवानांनी शर्तीचे प्रयत्न करून पंपाच्या दिशेने आग पसरू नये, यासाठी खबरदारी घेतली. मागच्या वर्षी जाफरगेट शेजारच्या पेट्रोल पंपाला आग लागली होती. अग्निशामक दलाच्या जवानांनी फोमच्या साहाय्याने ५ तास अथक प्रयत्न करून आग आटोक्यात आणली होती. तेव्हा पंपाच्या टाकीने जर आग पकडली असती, तर जवळचा परिसर आगीच्या विळख्यात सापडला असता. भविष्यात अशा दुर्घटना टाळण्यासाठी तत्कालीन पोलीस आयुक्त संजय कुमार यांनी शहरात नागरी वसाहतीमध्ये असलेले ५ पेट्रोलपंप धोकादायक ठरविले होते. त्यात जाफरगेट शेजारच्या पंपाचा समावेश होता. धोकादायक पंप हटविण्याची मोहीम आयुक्तांनी हाती घेतली होती; परंतु आजही धोकादायक पंप हटलेले नाहीत.