औरंगाबाद : शिवाजीनगर रोडवरील सह्याद्री हिल्स येथील अंतर्गत बारा मीटर रुंद रस्ता मूळ जमीन मालकाकडून गिळंकृत करण्याचा प्रयत्न होत असल्याचा आरोप सोमवारी पत्रकार परिषदेत सह्याद्री हिल्स सहकारी गृहनिर्माण संस्थेच्या पदाधिकाऱ्यांनी केला.
सुशीलादेवी रमेश बगाडिया यांच्या मालकीच्या जमिनीवर विकासक संजय दाशेटवार यांनी रो हाऊस आणि फ्लॅट तयार करून विकले. मागील काही वर्षांपासून नागरिक येथे राहत आहेत. ९ एकर ९ गुंठ्यांवर हा प्रकल्प असून, या प्रकल्पाच्या बाजूला १२ मीटर रुंद रस्ता बांधकाम परवानगी घेताना दर्शविण्यात आला आहे. हा रस्ता विकासकाने महापालिकेला नऊ वर्षांपूर्वी हस्तांतरित सुद्धा केला आहे. महापालिकेने आजपर्यंत रस्त्याचा ताबा घेतला नाही. त्यामुळे मूळ जमीन मालक बगाडिया यांच्या ताब्यात आजही जमीन आहे. महापालिकेला अनेकदा विनंती केल्यानंतरही रस्ता मोकळा करून देण्यात आलेला नाही. महापालिका हा रस्ता विकसित करीत नसेल, तर सोसायटीमधील नागरिक तो विकसित करण्यास तयार आहेत. रस्त्याच्या बाजूला आपल्या खाजगी जमिनीवर बगाडिया मातीचे ढिगारे टाकत असल्याचा आरोप सोसायटीमधील नागरिकांनी केला. विकासकाने बांधकाम परवानगी नुसार आजपर्यंत महापालिकेकडून भोगवटा प्रमाणपत्र सुद्धा घेतलेले नाही. मूळ जमीन मालकांना रस्त्याची जागा म्हणजेच ३ हजार ५०२ चौरस मीटर क्षेत्र परत घ्यायचे आहे, असा आरोपही पदाधिकाऱ्यांनी केला. या पत्रकार परिषदेस माजी उपमहापौर राजेंद्र जंजाळ, सोसायटीचे अध्यक्ष मुरलीधरन नायर, उपाध्यक्ष प्रशांत पारगावकर, मिलिंद परांजपे, अनिलकुमार दाबशेटे, विनोद नानोटकर, हेमंत खेडकर आदींची उपस्थिती होती.
महापालिकेने आज रस्ता विकसित करावा
माझ्या जागेतील बारा मीटर रुंद रस्ता महापालिकेला हस्तांतरित केला आहे ही वस्तुस्थिती आहे. रस्त्याच्या दोन्ही बाजूला माझी खाजगी जमीन आहे. महापालिका रस्ता विकसित करीत नसल्याने माझ्या खाजगी जमिनीवर अतिक्रमण होत आहे. महापालिकेने आजही रस्त्याची जागा मोजून घ्यावी आणि विकास करावा. आम्ही लावलेली तार फेंसिंग कोणत्याही क्षणी काढण्यासाठी तयार आहोत. विकासकाने माझी कोणतीही परवानगी न घेता घरे विकली आहेत. हा वाद वेगळ्या ठिकाणी न्यायप्रविष्ट आहे, असे रमेश बगाडिया यांनी ‘लोकमत’शी बोलताना नमूद केले.