पैठण : साखर कारखान्यास ट्रॅक्टरने ऊस घेऊन जाणाऱ्या शेतकऱ्यास मारहाण करून किमती ऐवज व ट्रॅक्टर लंपास करणाऱ्या दरोडेखोरास पैठण पोलिसांनी सोमवारी अटक केली व त्याच्याकडून गुन्ह्यात वापरलेली दुचाकी जप्त करण्यात आली, तर काही दिवसांपूर्वी ट्रॅक्टर पोलिसांनी हस्तगत केले होते. आरोपीने तालुक्यातील अनेक गुन्हे केल्याची कबुली दिली असल्याचे पोलीस निरीक्षक किशोर पवार यांनी सांगितले. कृष्णा धोंडीराम गोर्डे असे अटक केलेल्या आरोपीचे नाव आहे.
बीड जिल्ह्यातील गेवराई येथील बाळासाहेब जगन्नाथ ढेंबरे हे २० जानेवारी रोजी ऊस घेऊन जात होते. तेव्हा रात्री ११ वाजेच्या सुमारास दुचाकीवर आलेल्या चार जणांनी पैठण शिवारात त्यांना मारहाण करून त्यांच्याजवळील मोबाइल, रोख रक्कम व ट्रॅक्टर हिसकावून धूम ठोकली. याबाबत ढेंबरे यांनी पैठण ठाण्यात फिर्याद दिली. पोलिसांकडून तपास चक्रे फिरविली गेली. तेव्हा फरार आरोपी कृष्णा धोंडीराम गोर्डे हा औरंगाबाद शहरातील किलेआर्क भागात राहत असल्याची माहिती मिळाली. पैठण पोलिसांनी त्याला ताब्यात घेतले, तर आरोपीने गुन्ह्यात वापरलेली दुचाकी (क्र. एमएच २० एफटी १२७८) जप्त केली. सदर कारवाई पोलीस निरीक्षक किशोर पवार यांच्या मार्गदर्शनाखाली, सपोनि गजानन जाधव, पोउपनि सी.जी. गिरासे, रामकृष्ण सागडे, पोलीस नाईक गोपाल पाटील यांनी केली. पुढील तपास पोलीस उपनिरीक्षक सी.जी. गिरासे करीत आहेत.
यापूर्वी चोरले होते आठ विद्युतपंप
आरोपी कृष्णा गोर्डे याने यापूर्वी एमआयडीसी पैठण पोलीस ठाणा हद्दीतील शेतकऱ्यांच्या विहिरीतून आठ विद्युतपंप त्याच्या साथीदारांसह चोरी केल्याची कबुली दिली. त्याचबरोबर याच गुन्ह्यातील चार लाख रुपये किमतीचे ट्रॅक्टर (क्र. एमएच २३ एएस २८८२) यापूर्वी अटक केलेला आरोपी नितीन घटे याच्या कडून जप्त करण्यात आले आहे.
फोटो : आरोपीकडून जप्त करण्यात आलेल्या पल्सर मोटारसायकलसह पोलीस निरीक्षक किशोर पवार, साहेबराव गिरासे, गोपाळ नाईक व ताराचंद गव्हाणे आदी.
120421\1618238159108_1.jpg
पैठण