चितेगाव : रस्त्याच्या कडेला उभ्या असलेल्या ट्रकवर एक प्रवासी वाहतूक करणारा ॲपेरिक्षा जोरात धडकला. या अपघातात रिक्षामधील दोन जण ठार झाले. ही घटना रविवारी रात्री ९ वाजेच्या दरम्यान औरंगाबाद-पैठण रस्त्यावरील गेवराई येथे घडली.
औरंगाबाद-पैठण रस्त्यावरून औरंगाबादहून भरधाव वेगाने बिडकीनकडे ॲपेरिक्षा(क्र. एम.एच.२० ई एफ १२९४) जात होता. गेवराई येथे वळण रस्त्यावर उभ्या असलेल्या ट्रक(क्र. एम.एच २१ एक्स ४०३०)वर सदर ॲपेरिक्षा जोराने आदळला. या अपघातात ॲपेरिक्षामधील इसा हमीद जिलानी चाऊस(३०) व अफरोज सालर पठाण(३०, दोघे रा. बिडकीन, ता. पैठण) हे गंभीर जखमी झाले. जखमींना गेवराई ग्रामपंचायत सदस्य रऊफ शेख व त्यांच्या सहकाऱ्यांनी तत्काळ बिडकीन येथील रुग्णवाहिकेतून औरंगाबाद येथील घाटी रुग्णालयात दाखल केले. उपचारादरम्यान दोघांचीही प्राणज्योत मावळली. या अपघातात ऑपेरिक्षाचा पूर्णपणे चेंदामेंदा झाला आहे.
दोघेही जिवलग मित्र
या अपघातात ठार झालेले या इसा हमीद जिलानी चाऊस व अफरोज सालर पठाण हे दोघेही बिडकीन येथील रहिवासी असून दोघेही बालपणापासून जिवलग मित्र होते. दोघांचाही मृत्यू झाल्यानेे बिडकीन गावावर शोककळा पसरली आहे. घटनास्थळी चिकलठाणा पोलिसांनी पंचनामा केला असून पुढील तपास चिकलठाणा पोलीस ठाण्याचे सपोनि. विश्वास पाटील यांच्या मार्गदर्शनाखाली संपत राठोड करीत आहे.
फोटो : औरंगाबाद पैठण रस्त्यावरील उभ्या ट्रकवर आदळल्यानंतर ॲपेरिक्षा असा चेंदामेंदा झाला होता.