आनंदाचा रिंगण सोहळा

अंबाजोगाई : आषाढी एकादशीच्या निमित्ताने पंढरपूरकडे जाणाऱ्या अनेक दिंड्या व पालख्या अंबाजोगाईमार्गे जातात.

अविनाश मुडेगावकर ।लोकमत न्यूज नेटवर्कअंबाजोगाई : आषाढी एकादशीच्या निमित्ताने पंढरपूरकडे जाणाऱ्या अनेक दिंड्या व पालख्या अंबाजोगाईमार्गे जातात. या दिंडीतील वारकरी मागील सात वर्षांपासून अंबाजोगाई येथे अश्वरिंगण सोहळ्याचे आयोजन करतात. शनिवारी हिंगोली जिल्ह्यातील नरसीची संत नामदेव यांची पालखी, गंगाखेड येथील संत जनाबाई, कोंडूर (जि. हिंगोली) येथील संत विठोबा बाबा, गणोरी (जि. अमरावती) येथील महंमद खान महाराज यांची पालखी तर अकोला येथील भाऊसागर माऊली यांची पालखी शहरात दाखल झाली. या दिंड्यांना टाळ-मृदंगासह विठ्ठलनामाच्या गजरात योगेश्वरी मैदान येथे बँड पथक व फटाक्यांच्या आतिषबाजीत आणण्यात आले. यावेळी ध्वजारोहण, पालखी पूजन व अश्वपूजा करण्यात आली. यानंतर मनोहारी रिंगण सोहळा पार पडला.अश्व धावले रिंगणीअन् तुका झाला आकाशाएवढा..अशी अनुभूती अंबाजोगाईकरांनी अनुभवली.या सोहळ्यात सजविलेला अश्व, भगवी पताका हाती घेतलेले वारकरी लक्ष वेधून घेत होते. संत ज्ञानेश्वरांनी भिंत चालविलेल्या देखाव्याची भाविकांनी प्रशंसा केली. वारकऱ्यांच्या कुस्त्या, महिलांच्या फुगड्या व मैदानी खेळात भाविक तल्लीन झाले होते. यावेळी रिंगण सोहळ्याचे स्वागताध्यक्ष नंदकिशोर मुंदडा, अध्यक्ष दिलीप सांगळे, कार्याध्यक्ष बाबामहाराज जवळगावकर, उपाध्यक्ष दिलीप गित्ते, बाजार समितीचे सभापती मधुकर काचगुंडे, उपनगराध्यक्ष सारंग पुजारी, पंचायत समितीचे उपसभापती तानाजी देशमुख, पं. उद्धवराव आपेगावकर, वैजनाथ देशमुख, बळीराम चोपने, अनंत अरसुडे, अभिजीत जोंधळे, सुधाकर महाराज शिंदे, माजी नगराध्यक्ष महादू मस्के, मारूतीराव रेड्डी, बाळा पाथरकर, मुन्ना सोमाणी, योगेश कडबाने, पंकज लोमटे यांनी पालखी प्रमुखांचे स्वागत केले. अश्वरिंगण सोहळ्याच्या निमित्ताने वारकऱ्यांसाठी पिण्याचे पाणी व फराळाची व्यवस्था स्वागत समितीच्या वतीने करण्यात आली होती. हा रिंगण सोहळा यशस्वीपणे पार पाडण्यासाठी प्रशासनाच्या वतीनेही चोख नियोजन करण्यात आले होते. त्यामुळे भाविकांना आनंदाने यात सहभागी होता आले. हा रिंगण सोहळा पाहण्यासाठी अंबाजोगाई शहर व पंचक्रोशीतील महिला व भाविकांनी मोठी गर्दी केली होती.