श्यामकुमार पुरे
सिल्लोड : तालुक्यात मृग नक्षत्रात पेरणी योग्य पाऊस झाल्याने व नेहमीप्रमाणे काही शेतकऱ्यांनी धूळ पेरणी केल्यामुळे आतापर्यंत ८३ टक्के पेरण्या पूर्ण झाल्या आहेत. मात्र, पावसाने दडी मारल्याने आता ही पिके वाळू लागली असून, शेतकऱ्यांवर दुबार पेरणीचे संकट घोंघावत आहे.
तालुक्यात ९८ हजार ७०६ हेक्टर पेरणीयोग्य क्षेत्रापैकी ८२ हजार ३४६ हेक्टरवर (८३ टक्के) टक्के खरीप पेरण्या आटोपल्या आहेत. तालुक्यातील वार्षिक पर्जन्यमानाची सरासरी ६५० आहे. मागील दोन वर्षांत सरासरीपेक्षा दुप्पट पाऊस झाला होता. मागील वर्षी ७ जुलैपर्यंत २६३ मि.मी. पाऊस झाला होता, तर यावर्षी केवळ १७५ मि. मी. पावसाची नोंद झाली आहे. आतापर्यंत झालेल्या पावसात सर्वाधिक बोरगाव बाजार मंडळात २५० मि.मी. पाऊस झाला, तर सर्वात कमी अजिंठा सर्कलमध्ये केवळ ७८ मि.मी. पावसाची नोंद झाली आहे. गेल्या १५ दिवसांपासून तालुक्यात पाऊस नसल्याने जमिनीतून डोके वर काढणारे कोवळे पीक आता कोमेजून जात आहे. आता पाऊस आला तरी पिकांचे झालेले नुकसान भरून निघण्याची शक्यता नाही.
चौकट....
तालुक्यात जून महिन्यातील मंडळनिहाय पाऊस
मंडळ पाऊस
सिल्लोड १९० मि.मी.
भराडी १७३ मि.मी.
अंभई १५७ मि.मी.
अजिंठा ७८ मि.मी.
गोळेगाव १८१ मि.मी.
आमठाणा २३० मि.मी.
निल्लोड १४५ मि.मी.
बोरगाव बा. २५० मि.मी.
सरासरी १७५.५० मि.मी.
चौकट
मंडळनिहाय झालेल्या पेरण्या हेक्टरमध्ये
मंडळ कापूस मका सोयाबीन मिरची अद्रक
आमठाणा २६०३ २२४५ १४३ ४११ ४६५
अजिंठा २७५८ २९१२ ५५६ २६१ ८६
अंभई ३५६२ ५१४७ ५८७ ५२५ ४७८
भराडी ३१६२ २७८१ ३७२ २९६ ३४५
बोरगाव बा. ३४०९ २९६४ २४१ १७२ ३१९
गोळेगाव २५९८ २१०६ २९५ ६५५ १६८
निल्लोड ४३६४ ३८३० १६८ १५६ ३९१
पालोद ३१८० २६०७ ५१५ ४८५ २९३
शिवना २४९३ २११० ६५३ १८५ ७८
सिल्लोड ३५९९ ३०४५ ३१२ २२१ २६५
उंडणगाव २०१८ १९५३ १८० २३४ २०१
..........................................................................................
एकूण ३३७४७ ३१७०० ४०२२ ३५९८ ३०८९
चौकट
सर्वाधिक लागवड कापसाची
तालुक्यात जूनच्या सुरुवातीला चांगला पाऊस झाल्यानंतर शेतकऱ्यांनी काहीएक विचार न करता पेरण्या केल्या आणि अचानक पाऊस उघडल्यामुळे मका, कापूस, सोयाबीन, मिरची, अद्रक, मूग, उडीद, तूर ही पिके धोक्यात आली आहे. तालुक्यात सर्वाधिक ३३ हजार ७४७ हेक्टरवर कापूस, त्यानंतर ३१ हजार ७०० हेक्टरवर मका, ४ हजार २२ सोयाबीन, ३५९८ मिरची, ३०८९ हेक्टरवर अद्रक पिकांची शेतकऱ्यांनी लागवड केली आहे.
फोटो : सिल्लोड तालुक्यातील माना टाकत आलेले पीक.