१२६ उमेदवारी अर्ज मंजूर

उमरगा : येथील बाजार समिती निवडणुकीसाठी दाखल झालेल्या १२७ अर्जांची छाननी सोमवारी करण्यात आली. यात केवळ एक अर्ज बाद करण्यात आला असून, इतर १२६ अर्ज मंजूर झाले आहेत. दरम्यान, अर्ज माघारी घेण्यासाठी आणखी वीस दिवसांचा कालावधी असल्याने त्यानंतरच खरे चित्र स्पष्ट होणार आहे. अठरा जागांसाठी ही निवडणूक होत असून, सध्या शिवसेनेच्या ताब्यात असलेल्या या बाजार समितीवर सत्ता स्थापन करण्यासाठी प्रमुख चारही पक्ष पूर्ण ताकदीनिशी निवडणुकीच्या रिंगणात उतरल्याचे चित्र आहे. निवडणुकीसाठी तब्बल १२७ उमेदवारी अर्ज दाखल झाले होते. याची छाननी सोमवारी पार पडली. यावेळी ग्रामपंचायत अनुसूचित जाती व जमाती मतदारसंघातून उमेदवारी दाखल केलेले राम विठ्ठल लवटे यांच्याकडे जातीचे प्रमाणपत्र नसल्याने त्यांचा अर्ज नामंजूर करण्यात आला. ३० व ३१ मे ही अर्ज मागे घेण्याची तारीख असून, या दरम्यानच्या कालावधीत कोण कोणाला सोबत घेते की सगळे स्वबळावर निवडणूक लढतात हे ठरणार आहे. दरम्यान, या निवडणुकीसाठी ११६० मतदार असून, १९ जून रोजी मतदान तर २० जून रोजी मतमोजणी होवून निकाल जाहीर केला जाणार आहे. (वार्ताहर)