वन विभागाकडे बंदिस्त पोपटाला मुक्तीची प्रतीक्षा

शेजारी राहणाऱ्या एका महिलेला अश्लील शिवीगाळ केल्याच्या आरोपाखाली राजुरा पोलिसांनी ताब्यात घेतलेला पोपट सध्या वन विभागाच्या पिंजऱ्यात बंद आहे.

वन अधिकारी पेचात : पोपट उलगडेना मनातील गुपित बी.यू.बोर्डेवार  राजुराशेजारी राहणाऱ्या एका महिलेला अश्लील शिवीगाळ केल्याच्या आरोपाखाली राजुरा पोलिसांनी ताब्यात घेतलेला पोपट सध्या वन विभागाच्या पिंजऱ्यात बंद आहे. रानोमाळ मुक्तपणे विहार करण्याचे त्याचे स्वप्न यामुळे धुळीस मिळाले आहे. मानव जातीच्या दोन घटकांमधील अंतर्गत वादातून बंदीवास भोगावा लागलेल्या या पोपटाला आता मुक्तीची आस लागली आहे. दोन वर्षापूर्वीची गोष्ट असावी. राजीव गांधी वॉर्डातील भाऊराव वाटेकर यांच्या घराच्या अंगणात एक पोपट जखमी अवस्थेत पडून होता. या कुटुंबाने त्याला उचलून घरात घेतले. पाणी पाजले. त्या पोपटाची सुश्रूषा करून दोन-तीन वेळा त्याला उडविण्याचा प्रयत्न केला. परंतु हा पोपट उडू शकत नव्हता. त्यामुळे मानवतेच्या दृष्टीने त्या पोपटाला पिंजऱ्यात ठेवून त्याची देखभाल केली, पोपटाला घरच्या सदस्यासारखी वागणूक देऊन त्याचा सांभाळ केला.येथील भाऊराव वाटेकर अतिशय साधी व्यक्ती आहे. त्याचे भारत चौकात सलूनचे दुकान आहे. तथापि, सध्या पोपटावर जिवापाड प्रेम करणारा भाऊराव पोपट बंदिस्त असल्यामुळे हतबल झाले आहेत. ‘लोकमत’शी बोलताना भाऊराव म्हणाले, पोपट कसा शिवीगाळ करणार, खोटी तक्रार करून आमच्या कुटुंबाची बदनामी केली जात आहे. राजुरा पोलिसात कुठलाच आरोप सिद्ध झाला नसला तरी अद्याप पोपटाला आमच्या ताब्यात देण्यात आले नाही. एखादा मरणासन्न अवस्थेत पडलेल्या पशुला वाचविणे हा काय गुन्हा आहे, अशा त्याचा सवाल आहे. पोपट अपशब्द बोलतो हे कोर्टात कसे सिद्ध होणार, हे लक्षात येताच राजुराचे ठाणेदार प्रमोद डोंगरे यांनी हे प्रकरण राजुराचे वनपरिक्षेत्र अधिकारी याचेकडे सुपूर्द केले. वनअधिकाऱ्यांनी या पोपटाला वन विभागाच्या कोठडीत ठेवले. या बंदिस्त पोपटाला उंच भरारी मिळणार काय, असा प्रश्न निर्माण झाला आहे. राजुरातील शिवीगाळ करणारा पोपट कधीच शिवीगाळ करीत नसून आपसी वैमनस्यामुळे ही तक्रार दिल्या गेल्याचा आरोप भाऊराव वाटेकर यांनी केला आहे. राजुरा शहरात नवनवीन प्रकरण पुढे येत असले तरी वादग्रस्त पोपटाने पोलिसांपुढे सभ्यतेचे दर्शन दिल्यामुळे तक्रार करणाऱ्यांची हेतू अयशस्वी ठरला आहे.राजुरा शहरात सध्या पोपट प्रकरणाची चर्चा सुरू असून यापूर्वी या महिलेने राजुरा पोलीस ठाण्यात मुलाने खोटी कागदपत्रे तयार करून फसवणूक केल्याची तक्रार दिली आहे. या प्रकरणाची मात्र पोलीस यंत्रणेने कुठलीच चौकशी केली नाही आणि पोपटाचे प्रकरण येताच मात्र तत्परता दाखविण्याचा प्रयत्न केला गेला.वनविभागाच्या कोठडीत असलेल्या पोपटाचा गुन्हा काय, असा प्रश्न निर्माण झाला आहे. वन विभाग या विषयात कोणताच ठोस निर्णय घेत नसल्याने तूर्तास पोपट प्रकरण प्रलंबीत आहे.