चंद्रपूर : वाहनांमुळे होणाऱ्या प्रदूषणाला आळा घालण्यासाठी किमान दहा हजार किलोमीटर अंतर चाललेल्या वाहनाची प्रदूषण नियंत्रण चाचणी करण्याचा वाहतूक विभागाचा नियम आहे. मात्र अनेक वाहनचालक याकडे कानाडोळा करीत आहेत. जिल्ह्यात दुचाकी, चारचाकी यासह अवजड वाहने अशी एकूण चार लाख ५३ हजार १९२ वाहने रस्त्यावर धावत आहेत. या वाहनांद्वारे निघणाऱ्या धुराची तपासणी करण्यासाठी डिझेल व पेट्रोलचे मिळून केवळ ५३ पीयूसी केंद्र आहेत.
चंद्रपूर जिल्हा प्रदूषणासाठी कुप्रसिद्ध आहे. त्यातच दिवसेंदिवस वाढणाऱ्या वाहनांच्या संख्येमुळे प्रदूषणात आणखी भर पडत आहे. प्रदूषण नियंत्रण तपासणीसाठी उपप्रादेशिक परिवहन अधिकारी कार्यालयातर्फे प्रदूषण नियंत्रण तपासणीसाठी जिल्ह्यात पेट्रोलचे २६ व डिझेलचे २७ पीयूसी केंद्र कार्यरत आहेत. दहा हजार किमी वाहन चालल्यानंतर त्याची पीयूसी करणे अनिवार्य असताना अनेक वाहनचालक याकडे कानाडोळा करताना दिसत आहेत. तर अनेक वाहनचालक पेट्रोलऐवजी रॉकेलचाही वापर करतात. परिणामी प्रदूषणात वाढ होत आहे. अशा वाहनचालकांविरुद्ध कारवाई करणे गरजेचे आहे.
बॉक्स
प्रदूषित वाहने तपासणीचे दर
मोटार वाहन अधिनियम १९८८ नुसार वायुप्रदूषण तपासणी करून प्रमाणपत्र देण्याचे अधिकार पीयूसी केंद्राकडे आहेत. त्याचे दरही निश्चित करण्यात आले आहेत. दुचाकीसाठी ३५ रुपये, तीनचाकीसाठी ७० रुपये, चारचाकी ९०, डिझेलवरील वाहने शंभर रुपये आकारणी करण्याचे अधिकार आहेत. मात्र अनेक पीयूसीचालक अतिरिक्त दर आकारत असल्याची ओरड वाहनचालकांकडून होत आहे.
कोट
पीयूसी नसणाऱ्या वाहनचालकांवर कारवाई सुरू आहे. वाहनचालकांना ज्यावेळी वाहतूक कार्यालयात काम असते. त्यावेळेस त्यांचा पीयूसी काढण्याकडे ओघ असतो. त्यामुळे रस्ते सुरक्षा अभियानातंर्गत विशेष पीयूसी तपासणी मोहीम राबविण्यात येत आहे. यासोबतच पीयूसी केंद्रचालकांच्या मदतीने मोफत पीयूसी शिबिर राबविण्याचा मानस आहे.
किरण मोरे,
उपप्रादेशिक परिवहन अधिकारी, चंद्रपूर
बॉक्स
रस्त्यावर धावणारी वाहने
मोटारसायकल १,४८,५८८
स्कूटर, मोपेड १,९०,२६३
मोटार कार ३९,९००
जीप ८,३६८
कॅब १,४४९
ऑटोरिक्षा ८,९१०
बस १,३४०
रुग्णवाहिका ४३९
एचजीव्ही १३,४२३
एलजीव्ही १४,०३०
ट्रॅक्टर १६,६७१
ट्रेलर ८,२०८
इतर १,६०८