वाहनाच्या धडकेत तिघे जागीच ठार

आदिलाबादकडून येणाऱ्या वाहनाला कट मारुन जाण्याच्या नादात दुचाकीस्वार तिघांचा जागीच मृत्यू झाला.

कोरपना-आदिलाबाद मार्गावरील घटना : कट मारण्याच्या नादात दुचाकीला अपघातकोरपना : आदिलाबादकडून येणाऱ्या वाहनाला कट मारुन जाण्याच्या नादात दुचाकीस्वार तिघांचा जागीच मृत्यू झाला. ही घटना मंगळवारी दुपारी १ वाजताच्या सुमारास कोरपना-आदिलाबाद महामार्गावरील मेहंदी नाला पुलाजवळ घडली.सुनील कोंडूजी सहारे (२६) रा. तुकडोजीनगर कोरपना, आशिष गणेश भोयर (२२) रा. हिंगणघाट जि. वर्धा, माधवराव लक्ष्मण राऊत (३०) रा. सावंगी जि. यवतमाळ असे मृतांची नावे आहेत. मृतक हे एमएच- ३४ एक्स- ९४५० क्रमांकाच्या दुचाकीने तेलंगणा राज्यातील बेलाकडे जाण्यासाठी निघाले होते. मात्र कट मारण्याच्या नादात अपघात घडला आणि तिघेही दुचाकीवरुन फेकल्या गेले. पोलिसांनी घटनास्थळ गाठून कोरपना ग्रामीण रुग्णालयात शवविच्छेदन केले. घटनेचा तपास सुरू आहे. (वार्ताहर) लग्नकार्यावरून येताना अपघात; एक ठारब्रह्मपुरी : किन्ही गावातून लग्नकार्य आटोपून येत असताना वेटाळा फाट्याजवळ अज्ञात वाहनाची धडक बसल्याने ईश्वर बाबुराव डोईजड (४६) रा. ब्रह्मपुरी यांचा उपचारादरम्यान मृत्यू झाला. ही घटना मंगळवारी दुपारी घडली. मृत ईश्वर डोईजड हे किन्ही येथे लग्नकार्यासाठी मंगळवारी सकाळी स्वत:च्या दुचाकीने गेले होते. लग्नकार्य आटोपून परत ब्रह्मपुरीला येत असताना विरूद्ध दिशेने येणाऱ्या भरधाव अज्ञात वाहनाची त्यांना धडक बसली. या अपघातात ते गंभीर जखमी झाले. त्यांना तत्काळ ब्रह्मपुरीच्या ग्रामीण रुग्णालयात दाखल करण्यात आले. मात्र डॉक्टरांनी त्यांना मृत घोषित केले. पोलिसांनी अज्ञात वाहन धारकाविरूद्ध कलम २७९, ३०४, ८ (३९) भादंवि सहकलम १८४ मोटर वाहन कायद्यान्वये गुन्हा दाखल करून तपास सुरू केला आहे. (तालुका प्रतिनिधी)