मूल : दिवसेंदिवस विद्युतच्या वापराने प्रदूषण मानवजातीसाठी घातक परिणाम करणारे ठरत आहे. त्यावर उपाय म्हणजे जास्तीत जास्त सौर उर्जेचा वापर करणे गरजेचे आहे. हे हेरुन मूल शहरात प्रथमच गांधी चौकात सौर उर्जेचे वाहतूक सिग्नल लावण्यात आले. हे सिग्नल व्यवस्थित सुरू असल्याने सौर उर्जेचा वापर वाढल्याचे दिसून येत आहे. यासाठी नगर परिषदेच्या माझी वसुंधरा अभियानाच्या माध्यमातून प्रोत्साहन दिले जात असल्याने सौर ऊर्जेचा वापर अधिकाधिक वाढला असून, मूल शहरात दुकाने, घरात, कार्यालय, राईस मिल आदी ठिकाणी सौर ऊर्जा संच बसविण्यात आला आहे. त्यामुळे प्रदूषणावर काही प्रमाणात आळा बसणार आहे.
प्रदूषण ही फार मोठी समस्या असून, दिवसेंदिवस वाढतच असल्याचे दिसून येते. विद्युतचा वापर घरापासून तर कारखान्यापर्यंत केला जातो. यात होणारी स्पार्किंग असो की जास्त दाबामुळे जळणारे ट्रान्स्फार्मर असो यामुळे सर्वत्र प्रदूषण पसरत असते. यासाठी सौर ऊर्जावर चालणारी विद्युतवाहिनीचा वापर करणे आवश्यक ठरते. हे हेरुन मूल शहरात घरगुतीपासून तर औद्योगिक कामासाठी सौर ऊर्जाचा वापर वाढल्याचे दिसून येत आहे. प्रदूषण वाढू नये यासाठी शासनाने प्लॅस्टिकवर बंदी घातली आहे. मात्र आडमार्गाने काही प्रमाणात प्लॅस्टिकचा वापर सुरू आहे. हा वापर बंद होण्यासाठी सर्वांनी प्रयत्न करणे गरजेचे आहे, तसेच दुचाकीऐवजी सायकलचा वापर झाल्यास प्रदूषण कमी होण्यास मदत होईल.