वीज कंपन्यातील कामे मिळणार बेरोजगार अभियंत्यांना

वीज कंपन्यातील देखभाल व दुरुस्तीची कामे लॉटरी पद्धतीने थेट सुशिक्षित बेरोजगार विद्युत अभियंत्यांना देण्याचा

शासनाचा निर्णय : शेकडो बेरोजगारांना मिळणार कामचंद्रपूर : वीज कंपन्यातील देखभाल व दुरुस्तीची कामे लॉटरी पद्धतीने थेट सुशिक्षित बेरोजगार विद्युत अभियंत्यांना देण्याचा निर्णय राज्य शासनाने घेतला आहे. त्यामुळे शेकडो सुशिक्षित बेरोजगार अभियंत्यांच्या हाताला काम मिळणार आहे.सार्वजनिक बांधकाम विभागांतर्गत इमारती, रस्ते तसेच विद्युत विभागाची विविध कामे बेरोजगार अभियंत्यांकडून केली जातात. याच धर्तीवर महाराष्ट्र राज्य विद्युत वितरण कंपनी, महाराष्ट्र राज्य वीज पारेषण कंपनी आणि महाराष्ट्र राज्य वीज निर्मिती कंपनी या तिनही कंपन्यातील देखभाल व दुरुस्तीची कामे सुशिक्षित बेरोजगार अभियंत्यांना दिली जाणार आहेत. सार्वजनिक बांधकाम विभागाप्रमाणेच विद्युत सुशिक्षित बेरोजगार अभियंत्यांचा प्रथम नोंदणीचा वर्ग ‘ब-१’ असा राहील. त्यांना विद्युत कामे वाटपाची एकूण मर्यादा ५० लाखापर्यंतची असून प्रत्येक कामाची कमाल मर्यादा किमान दहा लाख रुपये इतकी राहणार आहे.सुशिक्षित बेरोजगार अभियंत्यांना कामे वाटप करण्यासाठी महावितरण, महापारेषणचे कार्यालय असल्यास अधीक्षक अभियंता आणि महानिर्मितीशी संबंधित विद्युत निर्मिती केंद्राचे काम असल्यास मुख्य अभियंता हे जिल्हास्तरावरील समितीचे अध्यक्ष राहणार आहेत. या समितीचे सदस्य सचिव संबंधित कार्यालयातील कार्यकारी अभियंता राहणार असून समितीत इतर तीन सदस्यांचा समावेश आहे. राज्य शासनाने यासंबधीत शासन निर्णय २६ मार्चला काढला आहे. या निर्णयाची अंमलबजावणी होणार असल्याने अनेक बेरोजगारर वीज अभियंत्यांना याचा लाभ होणार आहे. (स्थानिक प्रतिनिधी)किमान ५० टक्के कामे मिळणारविभागांतर्गत एकूण पार पाडायच्या वार्षिक कामांपैकी सरासरी किमान ५० टक्के कामे सुशिक्षित बेरोजगार अभियंत्यांना दिली जाणार आहेत. तसेच ज्या बेरोजगार अभियंत्यांनी पहिल्या वर्षात मिळालेली दहा लाखांची कामे मुदतीत पूर्ण केली त्यांना दुसऱ्या वर्षी १५ लाख रुपयापर्यंतची वार्षिक पाच कामे अशी एकूण ७५ लाख रुपयांची कामे लॉटरी पद्धतीने देण्यात येणार आहेत.