सावली : सावली-बोथली मार्गावर विरुद्ध दिशेने येणाऱ्या दोन दुचाकींची समोरासमोर धडक होऊन झालेल्या अपघातात एक जण ठार झाला असून चार जण गंभीर जखमी झाले आहेत.
एका दुचाकीवर तीन जण पांढरसराडवरून सावलीला येत होते. तर दुसऱ्या दुचाकीवरील दोघे जण बोथली मार्गाने जात होते. हा अपघात शुक्रवारी सकाळी ८.३० वाजताच्या दरम्यान सावली-बोथली मार्गावरील चिंतलवार राईस मिल पुढील वळणावर झाला.
एम. एच. ३४ ए. क्यू. ९९१२ या दुचाकीने पांढरसराडवरून उत्तम मारोती कन्नाके, सुष्मा उत्तम कन्नाके आणि मारोती गोविंदा कन्नाके हे सावलीला रुग्णालयात येत असताना सावलीवरून बोथलीला भरधाव वेगाने येणाऱ्या दुचाकी चालक कालीदास आबाजी घोडमारे आणि मागील बसलेला साथीदार बाळकृष्ण भजन चौधरी यांचे दुचाकीवरील नियंत्रण सुटल्याने विरुद्ध दिशेने येणाऱ्या दुचाकीला जबर धडक बसली. यात पाच जण गंभीरपणे जखमी झालेत. अपघाताची माहिती होताच रुग्णवाहिकेने पाचही अपघातग्रस्तांना ग्रामीण रुग्णालय सावली येथे प्राथमिक उपचार करून चार गंभीर जखमींना गडचिरोली येथील रुग्णालयात पाठविण्यात आले. परंतु पांढरसराड येथील मारोती गोविंदा कन्नाके यांचा उपचारादरम्यान मृत्यू झाला तर उत्तम मारोती कन्नाके यांना उपचारासाठी नागपूर येथे हलविण्यात आले. सावली पोलीस उपनिरीक्षक चिचघरे यांच्या मार्गदर्शनाखाली मेजर बोधे, मेजर मडावी, पो. शि. चव्हाण पुढील तपास करत आहेत.