चंद्रपूर : पालकमंत्री सुधीर मुनगंटीवार यांच्या सूचनेनुसार जटपुरा गेटवरील वाहतूक कोंडी सुरळीत करण्यासाठी सोमवारी सायंकाळी झालेल्या समितीच्या बैठकीत तात्पुरती उपाययोजना करण्याचा निर्णय झाला. त्या नुसार येत्या असाठवडा भरात या निर्णयाचीे अंमलबजावणी होणार आहे.जिल्हाधिकारी कार्यालयात झालेल्या या बैठकीला महापौर राखी कंचलार्वार, जिल्हाधिकारी डॉ. दीपक म्हैसेकर, जिल्हा पोलीस अधिक्षक संदीप दिवाण, मनपा आयुक्त सुधीर शंभरकर प्रामुख्याने उपस्थित होते. त्यांच्यासह पालकमंत्र्यांनी नेमलेल्या समितीमधील सदस्यही उपस्थित होते. या बैठकीत वाहतुक व्यवस्था निट करण्यासाठी तात्पुरती उपाययोजना लवकरच अंमलात येईल असे जिल्हाधिकाऱ्यांनी सांगीतले.शनिवारी झालेल्या बैठकीत पालकमंत्र्यांनी तात्काळ उपाययोजना करण्याच्या सूचना केल्या होत्या. त्यानुसार या बैठकीत अनेक पयार्यावर चर्चा करण्यात आली. दीर्घकालीन उपाययोजना व तात्पुरत्या उपाययोजना यावर विस्ताराने चर्चा करण्यात आली. गांधी चौकातून येणारी वाहतूक चांडक मेडिकल चौक समोरून वळविण्याबाबत चर्चा झाली. दुचाकी वाहतूक चांडक मेडिकल समोरून वळवावी व चार चाकी वाहतूक जटपुरा गेट मधून सोडावी अथवा महात्मा गांधी मार्गावर लेन आखून दुचाकी व चारचाकी वाहनांसाठी स्वतंत्र मार्ग आणि सिग्नल उभारण्याचा प्रस्ताव या बैठकीत मान्य करण्यात आला. जटपुरा गेटसमोर वाहतूक सिग्नल देऊन दुचाकी व चार चाकी वाहतूक नियंत्रीत करण्यात येणार आहे. या संबंधिची पाहणी जिल्हाधिकारी व जिल्हा पोलिस अधिक्षक एक दोन दिवसात करणार आहेत. कायमस्वरूपी उपाययोजनेमध्ये जटपुरा गेटला येऊन मिळणारे रस्ते विकास आराखडयाप्रमाणे मोठे करण्यासाठी मोहीम राबविणे, पयार्यी पार्कीग व्यवस्था करणे, भुमिगत विद्युत व्यवस्था, परकोटालगतचे अतिक्रमण हटविणे, समांतर वाहतूक व्यवस्था, फुटपाथ मोकळे करणे आदी बाबीवर बैठकीत चर्चा करण्यात आली. पुरातत्व विभागाचे अधिकारी भेटीवर येतील तेव्हा त्यांच्या निदर्शनास या बाबी आणून देण्याचे ठरले. जटपुरा गेटवरील वाहतूक कोंडी सोडविण्यासाठी अनेक सूचना मांडण्यात आल्या. या सुचनांचा विचार करुन निटनेटका वाहतुक आराखडा तयार करण्याचा प्रशासनाचा मानस आहे. भविष्यातील नियोजन या आराखडयात असावे असा सर्वांचा प्रयत्न राहणार आहे. (जिल्हा प्रतिनिधी)
जटपुरा गेटवरील वाहतूक कोंडीवर लवकरच होणार उपाययोजना
By लोकमत न्यूज नेटवर्क | Updated: November 17, 2015 01:54 IST