फोटो : कामगार वसाहतीची वरची सुरक्षा भिंत कोसळल्याने ये-जा करण्यास धोका निर्माण झाला आहे
घुग्घुस : वेकोली वणी क्षेत्राच्या घुग्घुस कामगार वसाहतीमधील सुभाष नगरच्या दुमजली कामगार वसाहत क्र ३९, ४०च्या वरच्या जिन्याची सुरक्षा भिंत कोसळली. मात्र, रात्रीची वेळ असल्याने मोठी घटना टळली. ही घटना गुरुवारी मध्यरात्री घडली.
या घटनेत खाली असलेल्या वाहनाचे नुकसान झाले आहे.
सुभाषनगरच्या सदर वसाहतीमधील क्वार्टर क्र ३९, ४० मधील कामगारांच्या कुटुंबियांचा खाली ये - जा करण्यासाठी धोकादायक मार्ग झाला तर रात्रीची घटना असल्याने खालच्या क्वार्टरच्या कुटुंबातील लोकांची सुदैवाने जीवितहानी टळली. खालच्या क्वार्टरमध्ये वास्तव्यास असलेल्या मंडळींची नेहमी वर्दळ असते. दिवसाची घटना असती तर जीविताला हानी पोहोचली असती.
वणी क्षेत्राच्या घुग्घुस परिसरात विविध कामगार वसाहती आहेत.
क्वार्टरच्या आतील वरच्या स्लॅबचे प्लास्टर पडत आहे. कामगार व त्यांच्या कुटुंबियांच्या जीविताला धोका निर्माण झाला असला तरी क्वार्टरच्या रिपेअरिंगकडे दुर्लक्ष होत आहे. यापूर्वी सुभाषनगरमधील पाणी पुरवठा करणाऱ्या टाकीच्या वरचा भाग कोसळला होता.
बॉक्स
क्वार्टर झालेत जीर्ण
ही वसाहत २५ वर्षे जुनी आहे. कामगार वसाहतीमधील अनेक क्वार्टर जीर्ण झाल्या आहेत. खिडक्या, दरवाजे, शौचालयाचे गटर तुटलेले आहे. सांडपाणी वाहून नेणाऱ्या नाल्या ठिकठिकाणी तुटलेल्या आहे. पाणी साचून राहात असते. समस्याग्रस्त कामगार वारंवार क्वार्टर दुरुस्तीसाठी व्यवस्थापन, कामगार संघटनांना तक्रारी करून दुरुस्तीसाठी साकडे घालतात. मात्र, त्याकडे दुर्लक्ष होत आहे. यापूर्वी स्लॅब कोसळण्याच्या घटना अनेकदा घडल्या.