नागभीड : नवेगाव पांडवच्या सरपंच ॲड. शर्मिला रामटेके यांनी हरियाणातील नवनियुक्त महिला सरपंचांना मार्गदर्शन केले. यावेळी त्यांनी महिला सरपंचांना येणाऱ्या अडचणींविषयी सखोल उहापोह केला.
मार्था फरेल फाऊंडेशन, दिल्लीद्वारा हरियाणा राज्यातील नवनियुक्त महिला सरपंचांना मार्गदर्शन करण्यासाठी नुकतेच एका ऑनलाईन संवाद कार्यशाळेचे आयोजन करण्यात आले होते. आपल्या सरपंचपदाच्या कार्यकाळात वर्तमानात कोणत्या अडचणी आल्या आणि भविष्यात कोणकोणत्या अडचणी येऊ शकतात, कोणकोणत्या संकटांना नवनियुक्त सरपंचांना तोंड द्यावे लागते यासारख्या अनेक मुद्द्यांवर या संवाद कार्यशाळेत ॲड. शर्मिला रामटेके यांनी मार्गदर्शन केले.
सरपंच ॲड. रामटेके यांनी सांगितले की, महिला म्हणून प्रत्येक स्त्रीला कौटुंबिक, सामाजिक, प्रशासकीय, जातीय, राजकीय काम करताना अनेक स्वरूपाच्या अडचणी येतात. पुरुषी सत्ता गाजवणारे व स्त्रियांना कमी लेखणाऱ्यांचा राजकारणात भरणा आहे. अशा मानसिकतेचे लोक कसे विनाकारण स्त्री लोकप्रतिनिधींच्या मागे लागतात व त्यांना त्रास देतात, यावरही विस्तृत मार्गदर्शन केले. महाराष्ट्र महिला राजसत्ता आंदोलनाच्या राज्य निमंत्रक मालती सगणे यांनीही या ऑनलाईन कार्यशाळेत नवनिर्वाचित सरपंचांना मार्गदर्शन केले.