कठीण परिस्थितीतही दोन मुलांना दिले शिक्षण
भोजराज गोवर्धन
मूल : मनात जिद्द, चिकाटी आणि परिश्रम करण्याची प्रबळ इच्छाशक्ती असली की, आकाशातही गगनभरारी घेता येते. याचे जिवंत उदाहरण मूल तालुक्यातील जानाळा येथील संगीता अनिल गेडाम यांच्याबाबतीत घडले.
मूल तालुक्यातील मौजा जानाळा येथील संगीता भीमराव नैताम हिचा १९९६ मध्ये भद्रावती तालुक्यातील मोबाळा येथील अनिल गेडाम यांच्याशी विवाह झाला. सुखी संसार सुरळीत सुरू असताना, २००३ मध्ये संगीता गेडाम ही अडीच वर्षांच्या मुलाला घेऊन जानाळा येथे बाळंतपणासाठी आली होती. दरम्यान, संगीताचे पती अनिल गेडाम यांनी क्षुल्लक कारणावरून आत्महत्या केली.
पतीने आत्महत्या केली, आता जीवन जगायचे कसे, अशा विवंचनेत सापडलेल्या संगीताचे आई आणि वडील तिच्या पाठीशी भक्कमपणे उभे राहिलेे. तिला आपल्या दोन मुलांच्या भविष्याची चिंता वाटू लागली होती, त्यामुळे ती जानाळा येथील ग्रामपंचायतीमध्ये निराधार योजनेचा फाॅर्म भरण्यासाठी गेली होती. परंतु, तिथे तिला ३०० रुपये लागतील, असे सांगितले. परंतु, तिच्याकडे एकही पैसा नसल्याने ती १५ वर्षांपूर्वी श्रमिक एल्गारचे तत्कालीन तालुकाध्यक्ष मारोती शेंडे यांच्याकडे गेली. शेंडे यांनी तिचे काम मोफत करून दिले. यामुळे ती श्रमिक एल्गारची कार्यकर्ती म्हणून काम करायला सुरुवात केली. संगीताची परिस्थिती इतकी हलाखीची होती की, ती दोन लहानलहान मुलांना शाळेत जाण्यासाठी साधा गणवेशसुद्धा घेऊन देऊ शकत नव्हती. तिची ही अडचण श्रमिक एल्गारने दूर केली. गरीब महिलांच्या कामासाठी संगीता एल्गार कार्यालयात येत असल्याने, संघटनेने तिला गरीब, कामगार, लोकांचे काम करण्यासाठी आग्रह केला. संगीतानेही तेवढ्याच आत्मीयतेने काम करण्यास होकार दिला, तेव्हापासून मूल तालुक्यातील गावागावांत जाऊन तिने निराधारांचे अर्ज भरून देण्याचे काम करीत होती. कालांतराने ती श्रमिक एल्गारची मूल तालुका सचिव म्हणून काम केले. संगीता सध्या श्रमिक एल्गार कार्यालयात डाटा एण्ट्रीचे काम करीत असून श्रमिक एल्गार कार्यालयात आलेल्या अन्यायग्रस्त नागरिकांना न्याय, हक्क मिळवून देण्याच्या कामात ती व्यस्त असते. संगीताने आपल्या मुलांना शिक्षण देण्यासाठीही खूप मेहनत घेतली. लहान मुले आता मोठी झालीत, समजदार झालीत. मोठा मुलगा मनोज हा बीए अंतिमला शिक्षण घेत आहे, तर लहान मुलगा अजय हा बीएमध्ये शिक्षण घेत आहे.