गोसेखुर्द प्रकल्पाच्या उजव्या कालव्याचा घोडाझरी उपकालवा नागभीड तालुक्यातील मौशी, मेंढा, किरमिटी, कोर्धा, नवेगाव पांडव, तुकूम, पळसगाव, गिरगाव, सावरगाव येथून पुढे गेला आहे. संबंधित विभागाने उपकालव्यासाठी शेतकऱ्यांची जमीन १० वर्षांपूर्वी संपादित केली होती. काही शेतकऱ्यांना मोबदलाही देण्यात आला. पण शेकडो शेतकरी आजही मोबदल्यापासून वंचित आहेत. त्यावेळी मिंथूर, नवेगाव पांडव येथील जमिनीला ४८ हजारांचा दर प्रति एकरप्रमाणे मोबदला दिला होता. हा अल्प मोबदला काही शेतकऱ्यांनी स्वीकारला तर काहींनी नकार दिला. नुकतेच याच विभागाने मिंथूर, नवेगाव पांडव परिसरातील एका शेतकऱ्याला ४ लाख ६७ हजार रूपये एकर याप्रमाणे मोबदला दिला. शेतकऱ्यांनी हाच पुरावा पुढे करून राज्य शासनाकडे वाढीव मोबदल्याची मागणी केली. या मागणीचे उत्तर शेतकऱ्यांना देण्यात आले. या उत्तरानंतर शेतकऱ्यांनी चंद्रपूर येथील कार्यालयात चौकशी केली असता येथील अधिकाऱ्यांनी गोंडपिपरी येथे जाऊन चौकशी करण्याचा सल्ला दिला. असे प्रकार अन्य प्रकरणांमध्ये घडत असल्याचा शेतक-यांचा आरोप आहे.
बॉक्स
गोंडपिपरी गैरसोयीचे
भूसंपादन कार्यालयाचे पूर्वी चंद्रपूर येथे होते. त्यामुळे न्याय मिळविण्यासाठी शेतकऱ्यांना पाठपुरावा करणे सोयीचे होते. मात्र हे कार्यालय गोंडपिपरी येथे हलविण्यात आल्याने शेतकऱ्यांची अडचण झाली आहे. नागभीड व ब्रम्हपुरी तालुक्याच्या दृष्टीने गोंडपिपरी हे ठिकाण गैरसोयीचे आहे.
कोट
गोंडपिपरी येथील कार्यालय गैरसोयीचेच नाही तर शेतकऱ्यांना आर्थिक व मानसिक त्रास देणारे ठरत आहे. त्यामुळे नागभीड किंवा ब्रम्हपुरी येथे हे कार्यालय हलवावे.
- गोपाल शिवणकर, शेतकरी मिंथूर.