राजुरा : तहसील कार्यालय, राजुरा येथे आमदार सुभाष धोटे यांच्या अध्यक्षतेखाली राजुरा येथील वाहतूक व्यवस्था, कायदा व सुव्यवस्थेविषयी आढावा बैठक पार पडली.
याप्रसंगी राजुरा शहरातील मुख्य मार्ग व अंतर्गत मार्गावर अनधिकृत, अधिकृत पार्किंगची व्यवस्था, शहरातील मुख्य आसिफाबाद मार्गावर जड वाहने विनाकारण थांबून असतात. शहरातील बाजारपेठेत पार्किंग व्यवस्था नसल्याने वाहने रस्त्यावर उभी असतात. त्यामुळे त्याचा इतरांना त्रास होतो. त्यावर उपाययोजना करणे. शहरातील सिग्नलची व्यवस्था कार्यरत आहे की नाही ते पाहणे, जड वाहनांच्या वेग मर्यादेबाबत उपाय करणे, ज्योतिबा शाळेजवळ वेग मर्यादेचा बोर्ड लावणे, शहरातील मुख्य मार्ग व अंतर्गत मार्गावरील अतिक्रमणामुळे वाहने रस्त्यावर उभी असतात, यासंदर्भात भूमिका निश्चित करणे, स्टंटबाज, कर्णकर्कश आवाजाची वाहने यावर बंदी घालणे, राजुरा शहरात सी. सी. टी. व्ही. कॅमेऱ्याची व्यवस्था अद्ययावत करणे, राजुरा ते सास्ती व राजुरा ते गडचांदूर रोडवरील अनधिकृतपणे उभे असलेल्या जड वाहनांमुळे अपघात होत असतात. यावर उपाय करणे, लायसन्स पासिंगकरिता राजुरा व कोरपना येथे नियमित शिबिर लावणे, राजुरा आगारातील बसेसची संख्या व स्थिती कशी आहे, इत्यादी अनेक महत्त्वपूर्ण विषयावर सविस्तर चर्चा करण्यात आली.
याप्रसंगी राजुराचे नगराध्यक्ष अरुण धोटे, उपनगराध्यक्ष सुनील देशपांडे, उपविभागीय अधिकारी संपत खलाटे, उपविभागीय पोलीस अधिकारी राजा पवार, परिवहन अधिकारी चंद्रपूर कुलवीरसिंग कलशी, राज्य उत्पादन शुल्क निरीक्षक मारुती पाटील, जिल्हा वाहतूक नियंत्रक घोडमारे आदी उपस्थित होते.