लावारी ग्रामपंचायतीच्या निवडणुकीत १२ उमेदवार रिंगणात

तालुक्यातील लावारी ग्रामपंचायतीची सार्वत्रिक निवडणूक २२ जूनला होत आहे. सात जागांपैकी एक जागा अविरोध निवडून आल्यामुळे सहा जागांसाठी १२ उमेदवार निवडणुकीच्या रिंगणात आहेत.

बल्लारपूर : तालुक्यातील लावारी ग्रामपंचायतीची सार्वत्रिक निवडणूक २२ जूनला होत आहे. सात जागांपैकी एक जागा अविरोध निवडून आल्यामुळे सहा जागांसाठी १२ उमेदवार निवडणुकीच्या रिंगणात आहेत. काँग्रेसप्रणित व भाजपाप्रणित पॅनल आमने-सामने आल्याने येथील निवडणुकीत अटीतटीचा सामना होत आहे.लावारी ग्रामपंचायतीच्या निवडणुकीसाठी येत्या २२ जूनला मतदान प्रक्रिया पार पडणार असून २३ जून रोजी मतमोजणी केली जाणार आहे. येथील प्रभाग एकमध्ये अनुसूचित जाती राखीव जागेसाठी धीरज देवानंद निरंजने व संध्या सारीपूत्र निरंजने यांच्यात लढत आहे. या प्रभागातून अनुसूचित जमाती महिला राखीव जागेवर शंकुतला वेलादी यापूर्वीच अविरोध निवडून आल्या.येथील प्रभाग दोनमध्ये सर्वसाधारण महिला राखीव गटात वनिता मारोती चुनारकर व मंजुळा भारत टेकाम, नागरिकांचा मागासप्रवर्ग महिला राखीव जागेसाठी वैशाली योगेश पोतराजे व सावित्रा रामचंद्र ठावरी तर अनुसूचित जमाती राखीव गटात पंढरी बाबुराव कोडापे व प्रेमकुमार टेकाम एकमेकांशी निवडून येण्यासाठी लढत देत आहेत.प्रभाग तीनमधील लढतीकडे गावकऱ्यांचे लक्ष लागले असून येथील नागरिकांच्या मागास प्रवर्गातील आरक्षित जागेवर उपसरपंच योगेश रामदास पोतराजे व गुणवंत मारोती भोयर यांच्यातील संघर्ष लक्ष वेधणारा असल्याची चर्चा मतदारांमध्ये केली जात आहे. याच प्रभागातील अनुसूचित जाती महिला राखीव जागेवर शोभा प्रमोद गोरघाटे व शिला प्रफुल्ल गोरघाटे यांच्यात काट्याची लढत होत आहे. येथील ग्रामपंचायतीच्या निवडणुकीत दोन्ही पॅनलकडून एकास एक उमेदवार मैदानात उतरले असल्याने तालुक्यातील राजकारण्यांचे या लढतीकडे लक्ष लागले आहे. मतदानाची तारीख जसजशी जवळ येत आहे, तसतसे वातावरण तापत आहे. (शहर प्रतिनिधी)