चंद्रपूर : सुमारे ३ लाख ५५ हजारांपेक्षा जास्त लोकसंख्या असलेल्या चंद्रपूर शहरात फक्त सहा केंद्र असून आतापर्यंत २५ हजार ६४१ जणांना कोरोना प्रतिबंधक लस देण्यात आली. आजपासून ४५ वर्षे व त्यापेक्षा अधिक वयोगटातील प्रत्येकालाच लस देणे सुरू झाले. एकूण लोकसंख्येच्या तुलनेत २७ टक्के म्हणजे ९५ हजार ९५४ नागरिक या वयोगटात येतात. मात्र, मर्यादित केंद्र व मनुष्यबळाअभावी याच गतीने लसीकरण शक्य नाही, हे लक्षात आल्यानंतर मनपाने ६३ लाखांचा निधी उपलब्ध करून देण्याचा प्रस्ताव नुकताच जिल्हाधिकाऱ्यांकडे सादर केला आहे.
चंद्रपूर शहरात सहा लसीकरण केंद्र सुरू आहेत. लोकसंख्येचा विचार केल्यास लसीकरण केंद्रांची संख्या पुरेशी नाही. ४५ वर्षे अथवा त्यापेक्षा जास्त वयोगटातील नागरिकांना लस द्यायची तर केंद्रांची संख्या, मनुष्यबळ व त्यासाठी संभाव्य आर्थिक समस्येचा अंदाज चंद्रपूर महानगर पालिकेला आला. त्यामुळे आयुक्त राजेश मोहिते यांच्या मार्गदर्शनात उपायुक्त विशाल वाघ व मुख्य वैद्यकीय अधिकारी डॉ. आविष्कार खंडारे यांनी पुढील ४५ दिवसांच्या लसीकरणाचा कृती आराखडा काही दिवसांपूर्वीच तयार केला. हा आराखडा जिल्हाधिकारी अजय गुल्हाने यांच्याकडे सादर करून त्यासाठी लागणाऱ्या खर्चाकरिता ६३ लाखांची मागणी करण्यात आली आहे.
७० हजार ३१३ जणांचे लसीकरण शिल्लक
लसीकरणासाठी पात्र वयोगटातील चंद्रपुरातील ९५ हजार ९५४ नागरिकांपैकी २५ हजार ६४१ जणांचे लसीकरण झाले. उर्वरित ७० हजार ३१३ जणांचे लसीकरण शिल्लक आहे. खर्चाची तरतूद नसल्याने आवश्यकता असूनही मनपाने केंद्रांची संख्या वाढविली नाही. मात्र, केंद्रनिहाय उद्दिष्टपूर्तीकडे लक्ष दिले जात आहे.
चंद्रपुरात १४ केंद्रांची गरज
शहरात दररोज ६०० नागरिकांचे लसीकरण सुरू आहे. ७० हजार नागरिकांचे लसीकरण पूर्ण करण्यासाठी १४ केंद्रांची गरज आहे. या केंद्रांमध्ये ४५ दिवस लसीकरण सुरू ठेवण्यास मनुष्यबळ व त्यांच्या मानधनासाठी २१ लाखांचा खर्च या आराखड्यात गृहीत धरण्यात आला. याशिवाय संभाव्य १८, १३ वर्षे किंवा त्यापेक्षा अधिक वयोगटाला लस देण्याची केंद्र सरकारने घोषणा केल्यास त्यासाठीही ४२ लाखांचा अपेक्षित खर्च या आराखड्यात नमूद केला आहे.