फोटो-०४सीपीपीएच१६ - शर्वीलचे आपल्या आई-वडिलासोबतचे संग्रही छायाचित्र.
वरोरा(चंद्रपूर) : डाॅ. शीतल आमटे-करजगी यांच्या मृत्यूला आज पाच दिवस झाले. आज डाॅ. शीतलचा सहा वर्षीय मुलगा शर्वीलचा वाढदिवसही होता. दरवर्षी आई डाॅ. शीतल वृक्ष लागवड करून आपल्या शर्वीलचा वाढदिवस साजरा करायची. आज शर्वीलने आईच्या आठवणीत वृक्ष लावून आपला वाढदिवस साजरा केला. याप्रसंगी आनंदवनातील वातावरण भावूक आणि नि:शब्द होते.
वृक्ष लागवड केल्यानंतर शर्वील आपल्या आईच्या समाधीजवळ गेला. त्यावेळी त्याच्या डोळ्यात आसवे तरंगत होती. हातात जास्वंदाचे फुल घेऊन बोबळ्या शब्दात मम्मा म्हणत त्याने आपल्या आईला ते अर्पण केले. या भावूक क्षणाचे साक्षीदार त्याचे वडिल गौतम करजगी, आजोबा डाॅ. विकास आमटे, आजी भारती आमटे, सुहासिनी करजगी व शिरिष करजगी यांच्यासह आनंदवनातील परिवार होता. शर्वील आईविना पोरका झालेला आहे. तो सतत आईची आठवण करीत असल्याचे समजते. त्याचे मन कुठल्याही गोष्टीत रमत नसल्याने त्याचे वडिल गौतम करजगी, आजी सुहासिनी करजगी व शिरिष करजगी यांनी त्याला या आठवणीतून काही काहीकाळासाठी का होईना बाहेर काढण्यासाठी नागपूरला घेऊन गेले असल्याची माहिती मिळाली.
आनंदवन पुर्वपदावर येत असला तरी कोणच्याही चेहऱ्यावर आनंद दिसला नाही. सारेकाही संपल्यागत आनंदवनातील मंडळी आपापली कामे करताना दिसून आली. आनंदवनात नीरव शांतता बघायला मिळाली.