चंद्रपूर : कापूस हे नगदी पीक असल्याने शेतकरी या पिकाकडे वळतात. विशेषतः कोरडवाहू क्षेत्रामध्ये या पिकाचे उत्पादन मोठ्या प्रमाणात घेतले जाते. त्याचाच फायदा घेत काही बियाणे कंपन्या बोगस बियाण्यांची विक्री करून शेतकऱ्यांची फसवणूक करतात. नुकतेच कृषी विभागाच्या भरारी पथकाने धाड टाकत ७० लाखांचे बोगस बियाणे जप्त केले. एचटीबीटी कॉटन बियाण्यांचा निषेध म्हणून जिल्हा अधीक्षक कृषी अधिकारी भाऊसाहेब बऱ्हाटे यांच्या नेतृत्वात कार्यालय परिसरात बोगस बियाणे पाकिटांची शेतकऱ्यांनी होळी करत निषेध नोंदविला.
यावेळी, जिल्हा गुणनियंत्रण निरीक्षक पी. आर. मडावी, कृषी सहाय्यक अनिल भोई, ढाकणे व शेतकरी उपस्थित होते. याप्रसंगी जिल्हा अधीक्षक कृषी अधिकारी भाऊसाहेब बऱ्हाटे, यांनी जिल्ह्यातील शेतकऱ्यांनी अधिकृत कृषी निविष्ठा केंद्र, कृषी केंद्र धारकांकडूनच मान्यताप्राप्त बियाणे अधिकृत पावतीसह खरेदी करावेत. कोणत्याही अनोळखी व्यक्तीकडून प्रतिबंधित कापूस बियाणे खरेदी करू नये तसेच एखादी व्यक्ती अनाधिकृत कृषी निविष्ठा विक्री करत असल्याची माहिती मिळाल्यास त्वरित तालुका कृषी अधिकारी, मंडळ कृषी अधिकारी तथा पोलीस विभागास कळवावे, असे आवाहन केले.
उपस्थित शेतकऱ्यांनी अनधिकृत कापूस बियाण्यांच्या पाकिटाची होळी करून निषेध व्यक्त केला. यापुढे अशाप्रकारची अनधिकृत व बोगस बियाण्यांचा वापर करू नये, असे आवाहन करण्यात आले.