जिल्हा परिषदमध्ये कनिष्ठ सहायक व परिचर पदांची भरती नसताना बल्लारपुरातील एका व्यक्तीने बनावट जाहिरातीच्या आधारावर काही युवकांना गाठले. नोकरीच्या आशेने युवकांनी अधिक चौकशी न करतात त्या व्यक्तीच्या जाळ्यात अडकले. २०१९-२० मध्ये सुमारे २० ते २५ युवकांकडून लाखोंची रक्कम घेऊन नोकरीसाठी पात्र ठरल्याचे सांगण्यात आले. काही दिवसांतच तत्कालीन जिल्हाधिकारी आणि तत्कालीन मुख्य कार्यकारी अधिकाऱ्यांची बनावट स्वाक्षरीच्या आधारे तीन युवकांना नोकरीवर रुजू होण्याचे आदेशही देऊन टाकले. सोमवारी हे युवक जि. प. मध्ये येऊन मुख्य कार्यकारी अधिकारी डॉ. मित्ताली सेठी यांना आदेश दाखविल्यानंतर फसवणूक झाल्याचे युवकांच्या लक्षात आले. युवकांच्या तक्रारीवरून जि. प. प्रशासनाने बुधवारी दुपारी रामनगर ठाण्यात तक्रार दाखल केली आहे.
बॉक्स
बल्लारपुरातून हलले बनावट स्वाक्षरीसूत्र
ज्या तीन युवकांना नोकरीचे बनावट आदेश देण्यात आले. त्या प्रकरणाचे सर्व सूत्र बल्लारपुरातून हलले. यापूर्वीदेखील काही युवकांना शासकीय नोकरीच्या नावावर गंडवूनही तक्रारी झाल्या नाही. परिणामी, या टोळीची हिंमत वाढल्याची चर्चा आहे. आज जि. प. प्रशासनाने पोलिसात तक्रार केल्याने फसवणूक झालेले बेरोजगार पुढे येण्याची शक्यता वर्तविण्यात येत आहे.
कोट
तत्कालीन जिल्हाधिकारी व मुख्य कार्यकारी अधिकाऱ्यांच्या बनावट स्वाक्षरीने नोकरीचा आदेश देऊन फसवणूक झाल्याची तक्रार जि.प.ला मिळाली. त्या आधारावर आज रामनगर पोलीस ठाण्यात आम्ही तक्रार केली. युवकांनी दिलेल्या माहितीनुसार, या प्रकरणाचा सूत्रधार कुणीतरी ब्रिजेशकुमार नावाचा व्यक्त असल्याचे समजते.
- श्याम वाखर्डे, अतिरिक्त मुख्य कार्यकारी अधिकारी, जि. प. चंद्रपूर.