कोरपना : उद्योगाची ओळख असलेल्या गडचांदूर शहरात एकही उद्यान नाही. उद्यानापासून वंचित शहर म्हणण्याची वेळ आली आहे. जिल्ह्यातील इतर शहरांच्या तुलनेत विचार केल्यास गडचांदूर मागासलेलाच असल्याचे चित्र आहे. कोरपना तालुक्‍याच्या मध्यभागी असल्याने व सिमेंट कंपन्यांचे जाळे असल्यामुळे गडचांदूर शहराला महत्त्व प्राप्त झाले. शहराची लोकसंख्या वेगाने वाढली. गडचांदूर गावाचे शहरात रूपांतर होऊन जवळपास सात वर्षे पूर्ण झाली आहे. नगरपरिषदेत रूपांतर झाल्यानंतर शहर वेगाने विकसित होईल, अशी लोकांची आशा होती. मात्र सिमेंट काँक्रिटीकरण वगळता काहीही नावीन्यपूर्ण कामे शहरात झालेली दिसून येत नाहीत.
बालकांना, महिलांना किंवा ज्येष्ठ नागरिकांना विरंगुळा करण्याकरिता शहरात २० ते २५ खुले भूखंड उपलब्ध असताना, कुठेही उद्यान निर्माण करण्यात आले नाही. शहरवासीयांना केवळ प्रदूषणयुक्त वातावरणात आपला वेळ काढावा लागतो. अनेक शहरांमध्ये नावीन्यपूर्ण कामे करण्यात आली असून, उद्यानेसुद्धा विकसित करण्यात आली आहे.