बल्लारपूर : भारतीय स्वातंत्र्यदिनाचा ७४ वा वर्धापनदिन शहरातील शासकीय, निमशासकीय कार्यालयात उत्साहाने साजरा करण्यात आला. तहसील कार्यालय नवीन प्रशासकीय भवन प्रांगणात ध्वजारोहणाचा मुख्य शासकीय कार्यक्रम सकाळी ९ वाजून ५ मिनिटांनी उपविभागीय अधिकारी डॉ. दीप्ती सूर्यवंशी-पाटील यांच्या हस्ते पार पडला. यावेळी तहसीलदार संजय राईंचवार, मुख्याधिकारी विजयकुमार सरनाईक, पोलीस निरीक्षक उमेश पाटील, नायब तहसीलदार रमेश कुलसंगे, तसेच अजय मेकलवार नगराध्यक्ष हरीश शर्मा व शहरातील मान्यवरांची उपस्थिती होती.
नगरपरिषद कार्यालयात शहराचे प्रथम नागरिक हरीश शर्मा यांनी राष्ट्रीय ध्वज फडकावून सलामी दिली. यावेळी मुख्याधिकारी विजयकुमार सरनाईक, कार्यालय अधीक्षक संगीता उमरे व नगरसेवक नगरपरिषदचे सर्व कर्मचाऱ्यांची उपस्थिती होती.
टेकडी विभागातील जयभीम चौकात जेबीबीएस ग्रुपच्यावतीने ध्वजारोहण कार्यक्रमात राष्ट्रीय ध्वज सहायक पोलीस निरीक्षक प्रमोद रासकर यांच्या हस्ते फडकविण्यात आला. यावेळी पीएसआय स्नेहा साळुंखे, आयोजक संतोष बेताल व जेबीबीएस सदस्यांची उपस्थिती होती. याप्रसंगी कोरोना काळात निर्भयपणे रुग्णांना सेवा देणारे माजी नगराध्यक्ष डॉ. मधुकर बावणे यांचा सत्कार करण्यात आला.
शहरातील मागासलेला परिसर शांतीनगर या ठिकाणी आम आदमी पक्षाचे शहराध्यक्ष रवी पुप्पलवार यांनी तिरंगा फडकवून सलामी दिली. कार्यक्रमात राकेश वडस्कर, सय्यद अफजल अली, ॲड. पवन वैरागडे व कार्यकर्त्यांच्या उपस्थितीत बालकांनी सांस्कृतिक कार्यक्रम सादर केले.
पशुवैद्यकीय दवाखाना श्रेणी १ च्या आवारात डॉ. संतोष रायपुरे यांच्या हस्ते ध्वजारोहण करण्यात आले. यावेळी अग्निशमन दलानी परेड संचालन केले. कार्यक्रमात दवाखान्याचे सर्व कर्मचारी व प्रमुख पाहुणे मुख्याधिकारी विजयकुमार सरनाईक, उपमुख्याधिकारी जयवंत काटकर यांची उपस्थिती होती.
160821\tahsil=-.jpg
ध्वजारोहण करून सलामी देताना उपविभागीय अधिकारी डाॅ.दीप्ती पाटील