धान खरेदी अनियमिततेविरोधात शेतकऱ्यांचा एल्गार

ब्रम्हपुरी तालुक्यात आधारभूत किंमत खरेदी योजनेअंतर्गत २०२०-२१ च्या धान खरेदीकरिता सात खरेदी केंद्रे चालू करण्यात आली व शेतकऱ्यांना बाजार समितीमार्फत सात-बाराप्रमाणे टोकन देऊन त्यानुसार अनुक्रमे धान खरेदी करण्यात येईल, असे सांगण्यात आले. मात्र प्रत्यक्षात असे न करता ज्या ज्या संस्थांकडे धान खरेदीचे काम दिले होते, तेथील लोकांनीच शेतकऱ्याच्या नावाने व्यवसाय चालू करून मर्जीतील लोकांचे व जे चिरीमिरी देतील, त्यांचे धान खरेदी करणे चालू केल्याचे शेतकऱ्याच्या निदर्शनास आले. ही बाब अन्यायग्रस्त शेतकऱ्यांनी संबंधित प्रशासनाच्या वारंवार निदर्शनास आणून दिली. परंतु याकडे जाणीवपूर्वक संबंधित प्रशासनाने दुर्लक्ष केले. त्यामुळे कुर्झा येथील शेतकऱ्यांनी उदय संस्था, ब्रम्हपुरीचे सचिव तथा भारतीय किसान संघाचे जिल्हा उपाध्यक्ष सुभाष माहोरे यांच्या नेतृत्वाखाली १० मार्चला प्रशासनाविरोधात उपोषणास बसण्याचे ठरविले व तसे निवेदन प्रशासनाला दिले, मात्र पोलीस निरीक्षक इंगळे यांनी संबंधित शेतकऱ्यांना पोलीस स्टेशनला बोलावून कोरोनाचा व कलम १४४ चा विषय पुढे करून वरिष्ठांसोबत चर्चा करून मार्ग काढण्याकरिता काही दिवसांची मुदत मागून घेतली. त्यानुसार पोलीस निरीक्षक यांच्या सूचनेचा आदर करून उपोषण तात्पुरते मागे घेण्यात आले. परंतु अजूनही प्रशासनाकडून काहीही हालचाल न झाल्याने शेवटी तहसीलदारांमार्फत मुख्यमंत्री उद्धव ठाकरे, कृषिमंत्री दादासाहेब भुसे, विरोधी पक्षनेते देवेंद्र फडणवीस, पालकमंत्री विजय वडेट्टीवार, जिल्हाधिकारी, उपविभागीय अधिकारी, जिल्हा मार्केटिंग अधिकारी यांना न्यायिक मागण्यांचे निवेदन देण्यात आले. १७ मार्चपर्यन्त मागण्या पूर्ण न झाल्यास १९ मार्चपासून उपोषण करण्याचा इशारा शेतकरी रामकृष्ण थोटे, हेमंत खेत्रे, गणेश गायधनी, रमेश विखार, सुनील विखार, अशोक ठोंबरे आदींनी दिला आहे.