खासगी जमिनीवर खोदकाम

राजुरा शहरातील तलाव सौदर्यीकरणासाठी ७ कोटी ८० लाख रुपये खर्च होणार असून १ कोटी ८० लाख रुपये केवळ तलावाच्या खोलीकरणावर खर्च होत आहे.

 राजुरा : राजुरा शहरातील तलाव सौदर्यीकरणासाठी ७ कोटी ८० लाख रुपये खर्च होणार असून १ कोटी ८० लाख रुपये केवळ तलावाच्या खोलीकरणावर खर्च होत आहे. खोलीकरणाचे काम जोरात सुरू आहे. मात्र यात खासगी जमिनीवर बुलडोजर चालवून जमिनीवर खड्डे केले जात आहे. त्यामुळे जमीनमालक चांगलेच त्रस्त झाले आहे. ज्या तलावाचे खोलीकरण सुरू आहे, त्या तलावाला लागूनच राजा बाना कलेगुरवार यांचा सर्वे क्रमांक १२७ भाग- २ मध्ये १.२० हेक्टर जमिनीचा पट्टा २३ जानेवारी १९९० ला राजुर्‍याचे तहसीलदार यांनी दिला. या पट्टयाची जमीन तलावाला लागूनच असल्यामुळे या खासगी जमिनीवरसुद्धा नगरपालिकेचा बुलडोजर चालत आहे. त्यांची पट्टयाची जमीन नासधूस करून खड्डा केला आहे. त्यामुळे राजा कलेगुरवार यांनी राजुरा पोलीस ठाण्यामध्ये मुख्याधिकारी यांच्या विरोधात जबरदस्ती पट्टयाच्या जमिनीवर खोदकाम करीत असल्याची तक्रार दिली. या प्रकरणाबाबत तहसीलदार एस.पी. खलाटे यांच्या दालनात नगर परिषदेचे मुख्याधिकारी विजय सरनाईक, नगर परिषदेचे अभियंता रवी जामूनकर आणि पट्टेधारक राजा कलेगुरवार यांची बैठक झाली. तहसीलदार यांनी पट्टयाची जमीन असल्यामुळे खोदकाम करता येत नसल्याचे संबंधित अधिकार्‍यांना सांगितले. तरीसुद्धा खोदकाम सुरूच असल्याचे राजा कलेगुवार यांनी ‘लोकमत’ शी बोलताना सांगितले. नगर परिषदेच्या सौदर्यीकरणाच्या प्रकरणात नगर परिषद राजुराचे नगरसेवक शरिफ सिद्धीकी यांनी चंद्रपूरचे जिल्हाधिकारी यांना पत्र पाठवून सौदर्यीकरणातून खोदकाम करून निघणारी माती राजुरा शहराच्या ओपनस्पेसवर टाकण्याचे कत्राटात म्हटले आहे. परंतु ही तलावातून निघणारी सुपीक माती खासगी ले-आऊटमध्ये नेऊन टाकण्यात येत असल्याचा आरोप शरीफ सिद्धीकी यांनी तक्रारीत केला आहे. या तलावातून निघणारी शेकडो ब्रास माती खासगी ले-आऊटमध्ये टाकण्यात येत आहे. हे नियमबाह्य असून याची चौकशी करण्याची मागणी केली आहे. राजुरा शहरातील तलावाच्या सौदर्यीकरणामुळे शहरातील पाण्याची पातळी वाढणार असून एक नाविण्यपूर्ण योजना तयार करण्यात येत आहे. त्यामुळे सर्व निकष पूर्ण करूनच काम करण्यात येत असल्याचे मत राजुरा नगरपरिषदेचे मुख्याधिकारी विजयकुमार सरनाईक यांनी व्यक्त केले. तलावाला लागून असलेल्या जमिनीचे पट्टेधारक राजा कलेगुरवार यांनी, आपल्या जमिनीवरील खोदकाम न थांबविल्यास आपण नगर परिषदेपुढे आमरण उपोषणाला बसणार असल्याचा इशारा दिला आहे. एकंदरीत तलाव सौदर्यीकरणात वेगवेगळे पैलू पुढे येत असून प्रत्येक बाबीवर लक्ष पुरविण्यात येत आहे. (शहर प्रतिनिधी)