होल्डिंगमुळे शहराचे विद्रुपीकरण
चंद्रपूर : शहरातील विविध चौकांमध्ये तसेच जागा मिळेल तिथे होल्डिंग लावल्या जात आहे. यावर महापालिका प्रशासनाचे नियंत्रण नसल्याचे दिसून येत आहे. शहरातील बहुतांश चौक यामुळे विद्रूप झाले आहेत. विशेष म्हणजे, होल्डिंग लावण्यासंदर्भात न्यायालयाचे कठोर नियम पाठावा लागते. मात्र याकडेही महापालिका प्रशासन दुर्लक्ष करीत आहेत.
रस्त्यावरील ती झाडे हटवावी
चंद्रपूर : येथील प्रियदर्शिनी इंदिरा गांधी पुतळा ते वरोरा नाका चौकापर्यंतच्या रस्त्याचे चौपदरीकरण तसेच डांबरीकण केले जात आहे. मात्र क्लब ग्राऊंड परिसरामध्ये रस्त्याच्या अगदी मधातच मोठमोठे वृक्ष आहे. यामुळे अपघाताची शक्यता नाकारता येत नाही. त्यामुळे सदर वृक्ष हटवून रस्ता मोकळा करणे गरजेचे आहे.
माठ विक्रीमध्ये वाढ
चंद्रपूर : मागील काही दिवसांपासून ऊन सातत्याने वाढत आहे. त्यामुळे थंड पाणी पिण्यासाठी माठांची मागणी वाढली आहे. शहरातील काही चौकांमध्ये माठ विक्रेत्यांनी मोठ्या प्रमाणात माठ विक्रीसाठी आणले आहे.
बांधकामांना आला वेग
चंद्रपूर : शहरातील विविध भागांमध्ये बांधकामे मोठ्या प्रमाणात केली जात आहे. विशेष म्हणजे, लाॅकडाऊन होते की, काय अशी अवस्था आहे. त्यामुळे बहुतांश व्यावसायिक हातातील बांधकाम पूर्ण करण्याकडे लागले आहे.
स्टेडियमची त्वरित दुरुस्ती करावी
चंद्रपूर : येथील जिल्हा स्टेडियमची दुरुस्ती केली जात आहे. मात्र काम संथगतीने सुरू असल्यामुळे नागरिकांमध्ये रोष व्यक्त केला जात आहे. येथील काम त्वरित करून दिलासा द्यावा, अशी मागणी केली जात आहे.
रस्त्यावरील खड्डे बुजवावे
चंद्रपूर: नवीन पाणी पुरवठा योजनेसाठी शहरातील विविध रस्त्यांचे खोदकाम करून पाईपलाईन टाकली जात आहे. मात्र रस्त्यावरील खड्डे त्वरित बुजविले जात नसल्याने अपघाताची शक्यता आहे. याकडे संबंधितांनी लक्ष द्यावे, अशी मागणी केली जात आहे.
कूलरची दुकाने सजली
चंद्रपूर : मार्च महिन्याच्या सुरुवातीपासूनच यावर्षी उन्हाची तीव्रता वाढली आहे. त्यामुळे नागरिक कूलर तसेच एसी लावण्याकडे वळले आहे. अडगळीत ठेवलेले कूलर बाहेर निघाले असून मोठ्या प्रमाणात कूलरची दुकानेही लागली आहेत.
हाॅटेलमधील गर्दीवर नियंत्रण हवे
चंद्रपूर : कोरोना रुग्ण संख्या वाढत आहे. त्यामुळे प्रशासनाने सतर्कतेचा इशारा दिला आहे. दरम्यान, गर्दीवर नियंत्रण मिळविणे गरजेचे आहे. असे असले तरी शहरातील काही हाॅटेलमध्ये मोठ्या प्रमाणात गर्दी होत आहे. त्यामुळे संबंधित विभागाने याकडे लक्ष देऊन गर्दीवर नियंत्रण मिळवावे, अशी मागणी केली जात आहे.
सिटीबस सुरू करावी
चंद्रपूर : चंद्रपूर शहराचा दिवसेंदिवस विस्तार वाढत आहे. मात्र त्या तुलनेत सुविधा नाही. दाताळा तसेच पडोलीपर्यंत जाण्यासाठी महापालिका प्रशासनाने सिटीबस सुरू करावी, अशी मागणी केली जात आहे.
कचरा संकलकांना सुविधा पुरवावी
चंद्रपूर : शहरातील प्रत्येक घराघरातून घंडीगाडीद्वारे कचरा संकलन केले जाते. मात्र मागील काही दिवसांपासून संकलकांना कोणत्याही सुविधा नसल्यामुळे त्यांचे आरोग्य धोक्यात येण्याची शक्यता आहे. या संकलकांना सुविधा उपलब्ध करून द्याव्या, अशी मागणी केली जात आहे.
लाॅन व्यावसायिकांची चिंता वाढली
चंद्रपूर : कोरोना रुग्ण वाढत आहे. त्यामुळे लग्नसमारंभावर निर्बंध आले आहे. परिणामी लाॅन संचालकांवर आर्थिक संकट कोसळले आहे. अनेकांनी ॲडव्हान्स पेंमेट वापस मागितला आहे. त्यामुळे त्यांना दिलासा देणे गरजेचे आहे.