चंद्रपूर : कोरोनाचे संकट वर्षभरात संपेल किंवा नाही याबाबत कोणीही भाष्‍य करू शकत नाही, त्‍यामुळे या संदर्भात दीर्घकालीन उपाययोजना करण्‍याची आवश्‍यकता आहे. बल्‍लारपूर येथे हवेतून ऑक्‍सिजन घेणारा प्‍लांट तयार करण्‍याबाबत आपण जिल्‍हाधिकाऱ्यांशी चर्चा केली. त्यांनी याला मान्‍यतादेखील दिलेली आहे. तिसऱ्या लाटेची शक्‍यता लक्षात घेता सन्मित्र सैनिकी शाळा, सुभाष टॉकीज, बीआयटी कॉलेज, येनबोडी येथील शाळा येथे ७५० बेड्स तयार होऊ शकतात. त्‍याचप्रमाणे जुन्‍या क्रीडासंकुलातसुध्‍दा कायमस्‍वरूपी हॉस्‍पिटल उभारले जाऊ शकते. यादृष्‍टीने बल्‍लारपूर शहर व तालुक्‍यासाठी पुढील पाच वर्षासाठी आरोग्यविषयक आराखडा तयार करण्‍याचे निर्देश विधिमंडळ लोकलेखा समितीचे प्रमुख तथा माजी अर्थमंत्री आ. सुधीर मुनगंटीवार यांनी दिले.
आमदार सुधीर मुनगंटीवार यांनी बल्‍लारपूर शहर व तालुक्‍यातील कोरोना प्रतिबंधक उपाययोजनांचा आढावा घेतला. या बैठकीत बल्‍लारपूरचे नगराध्‍यक्ष हरीश शर्मा, मुख्‍याधिकारी विजय सरनाईक, तहसीलदार संजय राईंचवार, उपविभागीय अधिकारी, ग्रामीण रुग्‍णालयाचे वैद्यकीय अधीक्षक, तालुका वैद्यकीय अधिकारी, काशी सिंह, नीलेश खरबडे, मनीष पांडे, समीर केने आदींची उपस्थिती होती.
बैठकीत आ. सुधीर मुनगंटीवार यांनी कोरोना प्रतिबंधक उपाययोजनांचा आढावा घेतला. प्रामुख्‍याने विसापूरनजीकच्‍या क्रीडासंकुलात तयार करण्‍यात येत असलेल्‍या १०० बेड डीसीएचसी रुग्‍णालयात ७० साधे बेड्स व ३० ऑक्‍सिजन बेड्स उपलब्‍ध होतील यादृष्‍टीने जलदगतीने कार्यवाही करण्‍याचे निर्देश त्यांनी यावेळी दिले.
यावेळी मुख्‍याधिकारी विजय सरनाईक, तहसीलदार संजय राईंचवार आदींनी कोरोनाविषयक उपाययोजनांची माहिती दिली. बैठकीला न.प. उपाध्‍यक्षा मीना चौधरी, नगरसेवक अरुण वाघमारे, साखरा बेगम नबी अहमद, येलय्या दासरप, सारिका कनकम, महेंद्र ढोके, जयश्री मोहुर्ले, स्‍वामी रायबरम, पूनम निरांजने, सुवर्णा भटारकर, आशा संगीडवार, गणेश बहुरिया, राकेश यादव, सुमन सिंह आदींची उपस्थिती होती.