हत्तीरोगाचे समूळ उच्चाटन करण्यासाठी आरोग्य विभागातर्फे दरवर्षी मार्च महिन्यात हत्तीरोग प्रतिबंध शोधमोहीम राबविण्यात येते. या मोहिमेंतर्गत गरोदर माता, स्तनदा माता व गंभीर आजारी असलेल्यांना वगळून दोन वर्षांपासूनच्या सर्वांना गोळ्यांचे वितरण करण्यात येते. यासोबतच वैयक्तिक व परिसरातील स्वच्छतेच्या अभावामुळे लहान मुलांच्या पोटात कृमी होतात. परिणामी रक्तक्षय, बालकांना कमजोरी येणे, बौद्धिक व शारीरिक वाढ खुंटणे असा परिणाम होऊ शकतात. याला टाळण्यासाठी जंतनाशक गोळ्या वाटप मोहीम १ मार्चपासून सुरू करण्यात येणार होती. आरोग्य विभागाचे पथक घरोघरी जाऊन गोळ्यांचे वितरण करणार होते. यासंदर्भात आरोग्य विभागाने नियोजन केले होते.
परंतु, जिल्ह्यात कोरोना रुग्णांची संख्या वाढत असल्याने घरोघरी जाऊन गोळ्यांचे वितरण करताना आरोग्य विभागाला कोरोना संसर्ग होण्याची शक्यता नाकारता येत नाही. त्यामुळे सद्य:स्थितीत या मोहिमेला सध्या स्थगित करण्यात आले असल्याचे आरोग्य विभागाने स्पष्ट केले आहे. कोरोना संसर्ग कमी झाल्यानंतर ही योजनाची प्रभावी अंमलबजावणी करण्यात येणार आहे.
बॉक्स
मोहीम लांबणीवर
जिल्ह्यात हत्तीरोग प्रतिबंधक मोहिमेंतर्गत गोळ्यांचे वितरण करण्यात येणार होते. शासनाच्या सूचनेप्रमाणे आरोग्य विभागाने नियोजन केले होते. परंतु, शहरासह जिल्ह्यात कोरोना रुग्णांची संख्या झपाट्याने वाढत आहे. त्यामुळे घरोघरी जाऊन मोहीम राबविल्यास कोरोनाचा संसर्ग वाढण्याची शक्यता आहे. ही बाब हेरून आरोग्य विभागाने सध्या ही मोहीम लांबणीवर टाकली असून, रुग्णसंख्या घटल्यानंतर सुरू करण्यात येणार आहे.
बॉक्स
हत्तीरोग प्रतिबंधक मोहीम राबविण्याकरिता आरोग्य विभागातील कर्मचारी, आशा स्वयंसेविका एमपीडब्लू यांचे पथक तयार करून वयोगटानुसार गोळ्यांचे वितरण करण्यात येणार होते. यासंदर्भात नियोजनही करण्यात आले होते. तशा सूचनाही संबंधित विभागाला देण्यात आल्या होत्या. परंतु, जिल्ह्यात कोरोनाचा संसर्ग वाढत असल्याने ही मोहीम तूर्तास समोर ढकलण्यात आली आहे.
कोट
हत्तीरोग प्रतिबंधक मोहीम दरवर्षी राबविण्यात येते. आरोग्य विभागाच्या आशा स्वयंसेविका व इतर कर्मचाऱ्यांच्या माध्यमातून वयोगटानुसार गोळ्यांचे वाटप करीत असतो. परंतु, सद्य:स्थितीत ही मोहीम थांबविण्यात आली आहे. वरिष्ठांचे निर्देश येताच ही मोहीम राबविण्यात येणार आहे.
- प्रकाश साठे, सहाय्यक जिल्हा आरोग्य अधिकारी, चंद्रपूर