चंद्रपूर : सरदार वल्लभभाई पटेल यांच्या जयंतीनिमित्त शुक्रवारी राष्ट्रीय एकता दिवस साजरा करण्यात आला. यानिमीत्याने आयोजीत ‘रन फॉर युनिटी’ दौडमध्ये चंद्रपूर शहरातील वरिष्ठ नागरिक, युवक- युवती, शालेय विद्यार्थी, स्वयंसेवी संस्था व प्रशासकीय अधिकारी राष्ट्रीय एकतेसाठी उत्स्फूर्तपणे धावले. दौडचे उद्घाटन जिल्हाधिकारी डॉ. दीपक म्हैसेकर यांनी केले. दौडमध्ये जिल्हा पोलीस अधीक्षक राजीव जैन, मुख्य कार्यकारी अधिकारी आशुतोष सलील, आयुक्त (कस्टम) प्रिती चौधरी, मनपा आयुक्त सुधीर शंभरकर व निवासी उपजिल्हाधिकारी सुधाकर कुळमेथे यांच्यासह अधिकारी- कर्मचारी, डॉक्टर, वकील व समाजातील प्रतिष्ठित व्यक्तींनी ‘रन फॉर युनिटी’मध्ये सहभाग नोंदवला.सरदार वल्लभभाई पटेल यांच्या जयंतीनिमित्त देशभरात रन फॉर युनिटी कार्यक्रम घेण्याचा निर्णय केंद्र व राज्य सरकारने घेतला होता. त्यानिमित्त चंद्रपूर येथे रन फॉर युनिटी दौड घेण्यात आली. पोलीस मुख्यालय येथून सुरु झालेल्या दौडचा जटपूरा गेट मार्गे पोलीस मुख्यालय या ठिकाणी समारोप करण्यात आला.जिल्हाधिकारी डॉ. दीपक म्हैसेकर यांनी या दौडला हिरवी झेंडी दाखविली. दौडमध्ये वरिष्ठ नागरिक पुरुष, महिला, खुला गट व शाळकरी मुला-मुलींचा गट आदींनी सहभाग घेतला होता. दौड नंतर पोलीस परेड ग्राऊंड येथे सरदार वल्लभभाई पटेल यांना पुष्पाजंली अर्पण करुन एकतेची सामूहीक शपथ घेण्यात आली. भारताची अखंडता व एकता आबाधीत ठेवण्यासाठी ही शपथ देण्यात आली.पोलीस परेड ग्राऊंड येथून पोलीस परेड काढण्यात आली. जटपूरा गेट ते परत पोलीस परेड ग्राऊंड असे परेड संचालन करुन पोलीस विभागाने राष्ट्रीय एकता दिनाच्या निमित्ताने वल्लभभाई पटेल यांना सलामी दिली.राष्ट्रीय एकता दिन कार्यक्रमात जिल्हा प्रशासन, महानगर पालिका, डॉक्टर, वकील, वनविभाग, इंडियन मेडिकल असोशिएशन, इकोप्रो, शाळा महाविद्यालय व स्वयंसेवी संस्थांनी उत्स्फूर्त सहभाग घेतला. उपविभागीय अधिकारी संजय दैने, उपजिल्हाधिकारी सीमा अहिरे, जिल्हा क्रीडा अधिकारी मुस्ताक शेख व प्रशांत आर्वे यांनी स्पर्धेतच्या आयोजनात महत्वाची भूमिका बजावली. यावेळी विद्यार्थ्यांसाठी निंबध, चित्रकला स्पर्धा, व्याख्यान घेण्यात आले. स्पर्धेतील विजेत्यांना बक्षीस देऊन गौरविण्यात आले. (स्थानिक प्रतिनिधी)
राष्ट्रीय एकतेसाठी उत्स्फूर्तपणे धावले चंद्रपूरकर
By admin | Updated: November 1, 2014 01:41 IST