ब्रह्मपुरी : नगर परिषद हद्दीत येत असलेल्या कुर्झा वॉर्डाची सीमा अऱ्हेर रोडच्या एक किमीपर्यंत आहे. कुर्झानंतर भुती नाला वाहतो. या पुलाची उंची फार कमी असून, अतिशय अरुंद असल्याने केव्हाही अपघात होण्याचा धोका संभवतो. त्यामुळे नगर परिषद प्रशासनाने नव्या पुलाचे बांधकाम करण्याची मागणी करण्यात येत आहे.
शहराच्या शेवटच्या टोकावर कुर्झा वाॅर्ड वसलेला आहे. आधी कुर्झा व बोंडेगाव ही स्वतंत्र ग्रामपंचायत होती. कालांतराने नगर परिषदेत समावेश करण्यात आला. ग्रामपंचायत काळात येथील भुती नाल्यावर पुलाची निर्मिती करण्यात आली होती. तेव्हापासून हा पूल ‘जैसे थे’ स्थितीत आहे. या मार्गाने अऱ्हेर, नांदगाव, भलेश्वर, पिंपळगाव येथील नागरिक प्रवास करतात. या पुलाची उंची व रुंदी फारच कमी आहे. नाल्याचे पाणी वाढल्यास हा मार्ग नेहमी बंद होतो. या पुलाची रुंदी फारच कमी असल्याने केव्हाही अपघात होण्याची दाट शक्यता नाकारता येत नाही. या मार्गावरून ट्रॅक्टर, दुचाकी वाहने, वाळूचे ट्रक, प्रवासी वाहणे नेहमी ये-जा करतात. नगर परिषदेच्या अखत्यारीत येत असल्याने नगर परिषदेने भुती नाल्यावर नव्याने रुंद व उंच पूल बांधकाम करण्याची मागणी नागरिकांकडून करण्यात येत आहे.