चंद्रपूर : लग्न करून घरी आणलेल्या नववधूच्या अंगावरील हळद उतरत नाही तोच दुसऱ्याच दिवसापासून तिच्याकडून गुप्तधनाच्या प्राप्तीसाठी अघोरी कृत्य करायला लावल्याचा खळबळजनक प्रकार अखिल भारतीय अंनिसने उजेडात आणला आहे.
समितीने दिलेल्या तक्रारीनुसार, चिमूर तालुक्यातील बिडकर येथील माजी जि.प. सभापती गुणवंत कारेकार यांचा मुलगा समीर याचा १९ आॅगस्ट २०१८ रोजी सविता हिच्याशी विवाह झाला. त्याचदिवशी समीरची आई घसरून पडली असता तिने सवितावर अवदसा, अपशकुणी असल्याचा ठपका ठेवला. यानंतर दुसºयाच दिवसापासून गुप्तधनाच्या लालसेपोटी पती, सासू व सासऱ्यांनी मिळून सविताला अघोरी पूजा करायला भाग पाडले. दररोज पहाटे ३ वाजता दर्गा पाण्याने धुवून स्वच्छ करणे. नंतर दर्ग्यामधील कासवाला पाण्याने आंघोळ घालणे. समीरच्या अंगात ताजुद्दीन बाबा येतो, त्यावेळी तो शिवीगाळ व मारझोड करेल ते सहन करणे.
कासवाची गंध, कुंकू, हळद लावून पूजा करणे, पूजा केल्यानंतर कासवाला दर्ग्याजवळ बसून एक-दीड किलो मुरमुरे खाऊ घालणे. हे करत असताना तिला दररोज मारझोड केली जात होती. या प्रकरणी जादुटोणाविरोधी कायद्यानुसार कारवाई करण्याची मागणी समितीने केली आहे.