पोंभूर्णा : शात, संयमी, प्रामाणिक, नम्र आणि अतिशय कर्तव्यदक्ष अधिकारी म्हणून पोंभुर्णा पंचायत समितीचे गटशिक्षणाधिकारी बाबुराव मडावी यांचा नावलौकिक आहे. त्यांच्या या गुणांमुळेच ते तालुक्यातील सर्व शिक्षकांचे आवडते आणि सर्वांना हवेहवेसे अधिकारी असल्याचे गौरवोद्गार पोंभुर्णा पंचायत समितीच्या सभापती अल्का आत्राम यांनी काढले.
पोंभुर्णा पंचायत समितीचे प्रभारी गटशिक्षणाधिकारी बाबुराव मडावी यांच्या स्थानांतरानिमित्त पोंभुर्णा पंचायत समिती कार्यालयामार्फत आयोजित निरोप समारंभाच्या कार्यक्रमात अध्यक्षपदावरून त्या बोलत होत्या.
यावेळी पंचायत समितीच्या उपसभापती ज्योती बुरांडे, सदस्य तथा माजी सभापती विनोद देशमुख, सदस्य गंगाधर मडावी, संवर्ग विकास अधिकारी धनंजय साळवे, सहाय्यक बी.डी.ओ. सुनिता मरसकोल्हे, सत्कारमूर्ती बाबुराव मडावी, शिक्षण विस्तार अधिकारी दिलीप सोनपुरे, शिक्षण समितीचे निमंत्रित सदस्य जे.डी. पोटे आदींची यावेळी उपस्थिती होती.
यावेळी बाबुराव मडावी यांचा पंचायत समिती कर्मचारी, पदाधिकारी, तसेच शिक्षक संघटनेचे पदाधिकाऱ्यांच्या वतीने शाल, श्रीफळ व भेटवस्तू देऊन सत्कार करण्यात आला. याप्रसंगी माजी सभापती विनोद देशमुख यांनी बाबुराव मडावी यांच्या कार्याचे कौतुक केले.यावेळी सत्काराला उत्तर देताना मडावी यांनी तालुक्यातील वेगवेगळे अनुभव सांगितले. सर्व शिक्षक व अधिकाऱ्यांविषयी कृतज्ञता व्यक्त केली. शिक्षक संघटनेच्या वतीने अभय कासनगोटुवार यांनी मत व्यक्त केले. प्रास्ताविक संवर्ग विकास अधिकारी धनंजय साळवे, संचालन लक्ष्मण सोनुले, आभार केंद्रप्रमुख विनायक औतकर यांनी मानले. कार्यक्रमासाठी केंद्रप्रमुख रोहणकर, कुंभरे व पंचायत समितीचे सर्व कर्मचारी व शिक्षक संघटनेच्या पदाधिकाऱ्यांनी सहकार्य केले.