नागभीड तालुक्यातील वाढोणा येथील ग्रामपंचायत निवडणुकीत भाजपचा तब्बल ४० वर्षांचा बालेकिल्ला असलेल्या वाॅर्ड क्रमांक ३ मध्ये राष्ट्रवादीचा उमेदवार निवडून आल्याने राकाँ-काँग्रेस महायुती आघाडीत आनंदाचे वातावरण पसरले आहे.
वाढोणा हे गाव नेहमीच ग्रामपंचायतीच्या राजकारणात वादग्रस्त ठरले आहे. यावेळी येथील ग्रामपंचायत निवडणूक काँग्रेस व राष्ट्रवादी काँग्रेसच्या महाआघाडीने संयुक्त लढविली होती. यामधील वाॅर्ड क्र.२ व ३ मध्ये राष्ट्रवादी काँग्रेसचे उमेदवार होते. वाॅर्ड क्र.३ हा गेल्या ४० वर्षांपासून भाजपच्या ताब्यात होता व बालेकिल्ला म्हणून ओळखला जात होता. मात्र, यावर्षीच्या ग्रामपंचायत निवडणुकीत राष्ट्रवादी काँग्रेसने सदर वाॅर्डात विजयश्री खेचून आणली. राष्ट्रवादी काँग्रेसचे तालुका अध्यक्ष डॉक्टर रघुनाथ बोरकर यांच्या नेतृत्वात वाॅर्ड क्रमांक तीन व दोनमध्ये राकाँचे अनिल दशरथ डोर्लीकर व मंगला राजू बोरकर हे उमेदवार उभे होते. हे दोन्ही उमेदवार निवडून आले आहेत. वाॅर्ड क्र. 4 च्या चुरशीच्या लढतीतही काँग्रेस महाआघाडीचे प्रदीप येसनसुरे आणि देवेंद्र गेडाम हे निवडून आले आहेत.