वृद्ध व अपंगांना बनविले आरोपी

शहरातील विंजासन परिसरामध्ये असलेल्या तलावाच्या मालकीवरुन दोन गटात झालेल्या मारहाण प्रकरणात पोलिसांनी चक्क दोन वयोवृद्ध व अपंगाना आरोपी बनविले. त्यांना बेदम मारहाणही केली.

भद्रावती : शहरातील विंजासन परिसरामध्ये असलेल्या तलावाच्या मालकीवरुन दोन गटात झालेल्या मारहाण प्रकरणात पोलिसांनी चक्क दोन वयोवृद्ध व अपंगाना आरोपी बनविले. त्यांना बेदम मारहाणही केली. पोलिसांच्या या कारवाईमुळे नागरिकांमध्ये रोष व्यक्त केला जात आहे. ६ डिसेंबरला विंजासन येथील ५२ एकर तलावाच्या मालकीवरुन दोन गटात जबरदस्त हाणामारी झाली. यात एका महिलेसह दहा जण जखमी झाले. या प्रकरणी पोलिसांनी केलेल्या कारवाईत आतापर्यंत ३४ जणांना ताब्यात घेतले. यापैकी महिला व वृद्ध आरोपींना न्यायालयाने जामीन दिला तर १३ आरोपींना न्यायालयीन कोठडी देण्यात आली. पोलिसांनी अटक सत्र राबविताना बळाचा वापर करुन अनेकांना जखमी केले. ८ डिसेंबरच्या पहाटे ७५ वर्षीय तानबा कृष्णा मांढरे व ६५ वर्षीय वृद्ध व अपंग महिला मंदा वाघू मांढरे यांना पोलिसांनी घरातून ओढून काठीने बेदम मारहाण करुन रक्तबंबाळ केले. यावेळी पोलिसांनी अश्लिल शिव्यांचा वापर केला. जखमी झालेले ४० ते ६० वर्षाच्या दरम्यानचे आहेत. त्यांना ७५ वर्षाचा वृद्ध आणि ६५ वर्षाची अपंग व वृद्ध महिला खरच मारहाण करुन जखमी करु शकते का, असा प्रश्न उपस्थित केला जात आहे. सदर दोन्ही वृद्धांनी ही आपबीती लोकमतजवळ सांगितली. हे दोन्ही वृद्ध पोलिसांच्या मारहाणीमुळे जखमी होते. तसेच अंगावरील कपडे रक्तांनी माखले होते. यातील एकाला काठीचा आधार घेतल्याशिवाय चालता येत नाही. पोलिसांनी अशा वृद्धांना मारहाणीतील आरोपी बनवून स्वत:ची पाठ थोपटून घेण्याचा प्रकार केला असून याबाबत रोष व्यक्त केला जात आहे. विंजासन या भागातील नागरिक पोलिसांच्या या दडपशाहीमुळे घरदार सोडून बाहेर गेले आहेत. (शहर प्रतिनिधी)