लोकमत न्यूज नेटवर्कचंद्रपूर : चंद्रपूर जिल्ह्यात कोराेनाचा विळखा दिवसेंदिवस घट्ट करत आहे. गेल्या २४ तासात २७६ नव्या कोरोना रुग्णांची भर भडली आहे. यामध्ये एकट्या चंद्रपूर महानगरात तब्बल १२० रुग्णांची भर पडली आहे. सोबतच ॲक्टीव्ह कोरोना रुग्णांचा आकडा दीड हजारांच्या घरात पोहचला आहे. ही संख्या १ हजार ४८० इतकी झाली आहे. १०९ रुग्णांनी कोरोनावर मात केली ही बाब दिलासा देणारी आहे.जिल्ह्यात आतापर्यंत एकूण बाधितांची संख्या २६ हजार २४४ वर पोहोचली आहे. सुरवातीपासून आतापर्यंत बरे झालेल्यांची संख्या २४ हजार ३५१ झाली आहे. सध्या १४८० बाधितांवर उपचार सुरू आहेत. आतापर्यंत दोन लाख ५९ हजार ८९४ नमुन्यांची तपासणी करण्यात आली असून त्यापैकी दोन लाख २७ हजार ९१६ नमुने निगेटीव्ह आले आहेत.जिल्ह्यात आतापर्यंत ४१३ बाधितांचे मृत्यू झाले असून यापैकी चंद्रपूर जिल्ह्यातील ३७४, तेलंगणा एक, बुलडाणा एक, गडचिरोली १९, यवतमाळ १६, भंडारा एक आणि वर्धा येथील एका बाधिताचा समावेश आहे.
चंद्रपूर व वरोरा झाले कोरोनाचे हाॅटस्पाटकोरोनाची लाट कमी होत असताना नव्या वर्षात पुन्हा कोरोनाने डोके वर काढले. या दुसऱ्या लाटेत चंद्रपूर महानगरासह वरोऱ्यात सर्वाधिक कोरोना रुग्ण वाढत आहे. ही रुग्णसंख्या बघता हे दोन्ही शहरे कोरोनाचे हाॅटस्पाॅट झाल्याचे दिसून येत आहे.
सात दिवसात चंद्रपूरात ४२१ नवे रुग्णगेल्या सात दिवसात चंद्रपूर शहरात तब्बल ४२१ नव्या रुग्णांची भर पडली. दररोज येणाऱ्या अहवालात चंद्रपूर शहरातील रुग्णांचा आकडा सर्वाधिक असल्याचे दिसून येत आहे. या पाठोपाठ वरोरा शहराचा क्रमांक लागतो. सात दिवसात वरोरा तालुक्यात ११० रुग्ण वाढले आहे.
पालकमंत्र्यांच्या बैठकीकडे लक्षजिल्ह्यात कोरोनाचे रूग्ण झपाट्याने वाढत आहेत. त्यातच होळी व रंगपंचमी उत्सव आल्याने बाजारात प्रचंड गर्दी उसळण्याची शक्यता आहे. त्यामुळे प्रतिबंधात्मक उपाययोजनांबाबत पुढील दिशा ठरविण्यासाठी जिल्हाधिकाऱ्यांच्या अध्यक्षतेखाली जिल्हा टास्क फोर्स समितीची गुरूवारी बैठक होणार आहे. त्यानंतर शुक्रवारी पालकमंत्री विजय वडेट्टीवार हे सर्व उपाययोजनांचा आढावा घेणार असल्याने याकडे नागरिकांचे लक्ष आहे.
जिल्ह्यात तीन दिवसांपुरताच लससाठाजिल्ह्यात ६९ केंद्र व चंद्रपूर मनपा अंतर्गत सात केंद्रातून कोरोना प्रतिबंधक लसीकरण सुरू आहे. मात्र, सध्या सुमारे कोविडशिल्डचे २५ हजार डोस उपलब्ध असल्याने नवीन डोसची प्रशासनाला प्रतीक्षा करावी लागणार आहे. मनपा क्षेत्रात आतापर्यंत २३ हजार ३३७ जणांनी डोस घेतला. गर्दी लक्षातून दोन केंद्र सुरू करण्याचे निश्चित झाले होते. मात्र, लससाठा उपलब्ध नसल्याने हा निर्णय पुढे ढकलण्यात आला. लससाठा मर्यादा असल्याने जिल्ह्यातही असेच चित्र आहे.