चंद्रपूर : मागील २४ तासांत जिल्ह्यात १७ कोरोनाबाधितांची भर पडली आहे. आठ जणांनी कोरोनावर मात केल्याने त्यांना रुग्णालयातून सुटी देण्यात आली. तर एका बाधिताचा मृत्यू झाला आहे.
बाधित आलेल्या १७ रुग्णांमध्ये चंद्रपूर महानगरपालिका क्षेत्रातील ६, ब्रह्मपुरी १, नागभीड १, वरोरा ५ तर कोरपना येथे ४ रुग्ण आढळले आहेत. चंद्रपूर तालुका, बल्लारपूर, भद्रावती, सिंदेवाही, मूल, सावली, पोंभुर्णा, गोंडपिपरी, राजुरा, चिमूर, जिवती या तालुक्यांत एकही रुग्ण आढळला नाही. ही जिल्ह्यासाठी दिलासादायक बाब आहे. मृत झालेल्यांमध्ये भद्रावती शहरातील एका महिलेचा समावेश आहे.
जिल्ह्यात आतापर्यंत एकूण बाधितांची संख्या ८४ हजार ९५६ वर पोहोचली आहे. तसेच सुरुवातीपासून आतापर्यंत बरे झालेल्यांची संख्या ८३ हजार ३०५ झाली आहे. सध्या ११७ बाधितांवर उपचार सुरू आहेत. आतापर्यंत ६ लाख १७८ नमुन्यांची तपासणी करण्यात आली असून, त्यापैकी ५ लाख ११ हजार ३७३ नमुने निगेटिव्ह आले आहेत. जिल्ह्यात आतापर्यंत १ हजार ५३४ बाधितांचा मृत्यू झाला.