निराधार योजनेतील लाभार्थींचे अनुदान जमा करा
सिंदखेड राजा : कोरोनाच्या पार्वभूमीवर संचारबंदी लागू असल्याने निराधार गोरगरिबांना आर्थिक टंचाईचा सामना करावा लागत आहे. अंध, अपंग, विधवा, श्रावणबाळ संजय गांधी निराधार योजनेतील लाभार्थींचे अनुदान तत्काळ त्यांच्या खात्यावर जमा करावे, अशी मागणी करण्यात येत आहे.
काेरोना टेस्टसाठी किटचा अभाव
बुलडाणा : कोरोना टेस्ट वाढल्यामुळे तपासणी केंद्रामध्ये किट कमी पडत आहेत. त्यामुळे कोरोना तपासणी करण्यासाठी येणाऱ्यांना केंद्रामधून परत पाठविण्यात येत आहे. बुलडाण्यातील बहुतांश केंद्रामध्ये हीच परिस्थती असल्याचे दिसून येते.
सरस्वती, अजीसपूर येथे पॉझिटिव्ह
लोणार : ग्रामीण भागात कोरोनाबाधितांची संख्या आता वाढत आहे. १९ एप्रिल रोजी तालुक्यातील सरस्वती येथे दोन व अजीसपूर येथे दोन कोरोना पॉझिटिव्ह रुग्ण सापडले आहेत.
बुलडाण्याला ४५ ऑक्सिजन सिलिंडर
बुलडाणा: शहरात ऑक्सिजन सिलिंडरचा तुटवडा निर्माण झाला आहे. दरम्यान, १९ एप्रिल रोजी बुलडाण्यासाठी ४५ ऑक्सिजन सिलिंडर उपलब्ध करण्यात आले आहेत. वाढती कोरोना पॉझिटिव्हची रुग्णसंख्या बघता ऑक्सिजनची कमतरता भासत आहे.
संचारबंदीमुळे ऊस पिकाचे नुकसान
बीबी : संचारबंदीमुळे ऊस पिकाचे नुकसान होत आहे. साखर कारखान्याला ऊस देता येत नाही. ऊसतोडणी मजूर सुद्धा मिळत नाही. रसवंतीही बंद झाल्याने त्या व्यावसायिकांनी करार सोडून दिले आहेत. त्याचा फटका शेतकऱ्यांना बसला आहे.
गरजूंना जीवनावश्यक वस्तूंचे वाटप
बुलडाणा : कोरोनाच्या पार्श्वभूमीवर येथील गरजूंना जीवनावश्यक वस्तूंचे वाटप करण्यात आले. संचारबंदीमुळे कामे बंद असल्याने नागरिकांची गैरसोय होत आहे. यावेळी विविध संघटना पुढाकार घेत आहेत. मात्र, सामाजिक कार्याचे हे प्रमाण गतवर्षीपेक्षा कमीच आहे.
अंगणवाडी कर्मचारी संकटात
सुलतानपूर : कोरोनासारख्या राष्ट्रीय आपत्तीत जीवाची पर्वा न करता काम करणाऱ्या अंगणवाडी कर्मचाऱ्यांना वेळेवर वेतन मिळत नाही. त्यामुळे त्यांच्या कुटुंबाची उपासमार होत आहे. या कर्मचाऱ्यांना अग्रक्रमाने मानधन देण्याबाबत शासनाने आदेश देण्याची गरज आहे.
खासगी शाळांचे पेपर ऑनलाइन
बुलडाणा: काही खासगी शाळांकडून ‘टेस्ट पेपर’ सुद्धा व्हॉट्सअॅपच्या माध्यमातून विद्यार्थ्यांकडून सोडवून घेतल्या जात आहेत. विद्यार्थ्यांनी काय वाचले, काय लिहिले, गणित कसे सोडविले याची तपासणी संबंधित शिक्षकांकडून करण्यात येत आहे.
रात्रीच्या भारनियमनामुळे नागरिक त्रस्त
बुलडाणा : कोरोनाच्या भीतीने जिल्ह्यातील अनेक गावांमधील नागरिक शेतात राहायला गेले आहेत. मात्र कृषिपंपासाठी रात्रीचे भारनियमन असल्याने त्यांना त्रास सहन करावा लागत आहे. भारनियमन बंद करावे, अशी मागणी नागरिक करीत आहेत.
फळ प्रक्रिया उद्योगांचा अभाव!
सिंदखेडराजा : फळ उत्पादक शेतकऱ्यांची सिंदखेडराजा तालुक्यात संख्या लक्षणीय आहे. ते शेती, बाग यातच ते गुरफटलेले असतात. यावर्षी ५० हून अधिक शेतकऱ्यांनी टरबूज, खरबुजाची लागवड केली आहे, परंतु बाजारपेठ उपलब्ध नसल्याने बागायतदारांना स्वत: च फळे विकावी लागत आहेत. शेतकरीच व्यापारी झाल्याचे चित्र दिसून येत आहे.
टेलरिंग व्यवसायाची अवकळा
हिवरा आश्रम : ग्रामीण भागात शिलाई मशीन व्यवसायाला कोरोनाचा फटका बसला आहे. लग्नसराई थांबल्याने टेलरिंग व्यवसायावर अवकळा पसरली आहे. ग्रामीण भागात सरासरी नागरिक कपडे शिवून घालतात. लग्नसराईच्या दिवसात टेलरिंग व्यावसायिकांची चंगळ असते.