जळगाव जामोद (बुलढाणा) : तालुक्यातील एका गावात जिल्हा परिषद शाळेतील इयत्ता तिसऱ्या वर्गात शिकणाऱ्या विद्यार्थ्यासोबत शिक्षकाने अनैसर्गिक कृत्य केल्याची खळबळजनक घटना ७ जुलै रोजी दुपारी ४ वाजता दरम्यान घडली. याप्रकरणी दाखल तक्रारीवरून संबंधित शिक्षकास अटक करण्यात आली आहे. तर घृणास्पद कृत्य करणाऱ्या शिक्षकाविरुद्ध पालक वर्गात संतापाची लाट निर्माण झाली.
पोलिस सूत्रांकडून मिळालेल्या माहितीनुसार, पीडित विद्यार्थी हा जिल्हा परिषद शाळेतील इयत्ता तिसरीत शिकत आहे. तो वर्गामध्ये विद्यार्थ्यांसमोर पुस्तक वाचन करीत होता. त्यावेळी आरोपी शिक्षकाने त्याला समोर बोलावून त्याचे सोबत अनैसर्गिक कृत्य केले. याबाबत पीडित विद्यार्थ्यांच्या आईने ८ जुलै रोजी जळगाव जामोद पोलिस ठाण्यात तक्रार दिली.
त्यावरून जळगाव पोलिसांनी आरोपी शिक्षक जावेदोद्दीन नसीमोद्दीन पटेल (३६) याच्याविरुद्ध पोक्सो कायद्यातील कलम (४) (६), भादंविच्या कलम ३७७, ५०६ नुसार गुन्हा दाखल केला. तसेच आरोपीस अटक केली आहे. पीडित विद्यार्थ्याला वैद्यकीय तपासणीसाठी बुलढाणा जिल्हा सामान्य रुग्णालयात पाठवण्यात आले.