अज्ञात वाहनाच्या धडकेत दुचाकीस्वार ठार

दुचाकीस्वाराचा जागीच मृत्यू; खामगाव तालुक्यातील घटना.

खामगाव (जि. बुलडाणा), दि. २६-: अज्ञात वाहनाच्या धडकेत ४१ वर्षीय दुचाकीस्वाराचा जागीच मृत्यू झाल्याची घटना सोमवारी सकाळी गणेशपूरजवळ घडली. मेहकर येथील संतोष सखाराम डाहाळे (वय ४१) हे त्यांच्या विनानंबरच्या दुचाकीवरून सोमवारी सकाळी मेहकरवरून खामगावकडे येत होते. दरम्यान, चिखली मार्गावरील गणेशपूर गावाजवळ सकाळी ५ ते ६ वाजताच्या सुमारास भरधाव वेगाने धावणार्‍या अज्ञात वाहनाने त्यांच्या दुचाकीला धडक दिली. या अपघातात संतोष डाहाळे यांचा जागीच मृत्यू झाला. मृत डाहाळे यांच्या डोक्यावरून अज्ञात वाहनाचे चाक गेल्यामुळे त्यांच्या डोक्याकडील भाग चेंदामेंदा झाला होता. घटनेची माहिती मिळताच हिवरखेड पोलिसांनी घटनास्थळी धाव घेऊन पंचनामा केला. यावेळी नागरिकांची पाहण्यासाठी एकच गर्दी झाली होती. मृत डाहाळे यांच्या प्रेताचे सामान्य रुग्णालयात शवविच्छेदन करून त्यांचा मृतदेह त्यांच्या नातेवाइकांच्या ताब्यात देण्यात आला. या प्रकरणात सोनू प्रभाकर तंबोले रा.शिवाजीनगर खामगाव यांनी दिलेल्या फिर्यादीवरून हिवरखेड पोलिसांनी अज्ञात वाहनचालकाविरुद्ध कलम २७९, ३0४ (अ) भादंविनुसार गुन्हा दाखल केला आहे. घटनेचा तपास हिवरखेड पोलीस स्टेशनचे पोलीस उपनिरीक्षक गणेश मानेकर करीत आहेत.