देऊळगावराजा, दि. २0- दुचाकीस धक्का लागल्याच्या कारणातून एका व्यक्तीने ट्रेलर चालकास बाहेर ओढले. या दरम्यान सदर चालकाचे नियंत्रण सुटल्यामुळे ट्रेलरने रस्त्यावरील एका काळीपिवळीला धडक दिली. या अपघातात एक जण ठार तर चार जखमी झाले. हा अपघात २0 मार्च रोजी सायंकाळी स्थानिक अजिंठा गेस्ट हाऊस समोर घडला. सोमवारी सायंकाळी बस स्थानकासमोर वाहतूक ठप्प झाली होती. दरम्यान एम.एच.२६ ए.डी. ६५८२ या मालवाहू ट्रेलरचा एका दुचाकीस धक्का लागला. त्यामुळे परमेश्‍वर नावाच्या व्यक्तीने सदर ट्रेलर चालकास खाली खेचले. यामुळे ट्रेलर चालकाचे वाहनावरील नियंत्रण सुटून ट्रेलर काळीपिवळी थांब्यावर उभी असलेल्या काळीपिवळी एम.एच.२८ एच 0७0१ क्रमांकाच्या काळीपिवळी व आयशर एम.एच.२१-६८९६ क्रमांकाच्या आयशरवर वर धडकला. यामुळे काळीपिवळी चालक शेख मुश्ताक, शिवाजी बाबुराव शेरे, नर्मदा छगनअप्पा बोंद्रे, शांताबाई मुरलीधर तायडे व मनिषा गिताराम जाधव गंभीर जखमी झाले. नागरिकांसह पोलिसांच्या मदतीने जखमींना ग्रामीण रूग्णालयात दाखल करण्यात आले. आरोग्य अधिकारी आकाश गोलांडे यांनी जखमीवर उपचार केले. उपचारादरम्यान शिवाजी बाबुराव शेरे रा.बोराखेडी बावरा (वय ४६) या व्यक्तीचा मृत्यू झाला. तर उर्वरीत चारही गंभीर जखमींना जालना येथे हलविण्यात आले. ट्रेलर चालकास पोलिसांनी ताब्यात घेतले असून चालकास चालत्या वाहनातून बाहेर खेचणार्‍या परमेश्‍वर नावाच्या व्यक्तीचा शोध सुरू आहे.
ट्रेलरची काळी-पिवळीला धडक, १ ठार, ४ जखमी
By admin | Updated: March 21, 2017 02:03 IST